इंडियन टीव्ही न्यूज प्रताप नागरे
बार्शी–परंडा ड्रग्स रॅकेट उघडकीस उल्लेखनीय तपास कामगिरीबद्दल बार्शी पोलिसांना विशेष पोलीस महानिरीक्षकांकडून गौरवपत्र
बार्शी – बार्शी शहर पोलीस ठाण्याच्या गुन्हे प्रकटीकरण शाखेने केलेल्या नियोजनबद्ध, तांत्रिक व समन्वित तपासाच्या आधारे बार्शी–परंडा परिसरात कार्यरत असलेले अमली पदार्थ विक्रीचे मोठे रॅकेट उघडकीस आणण्यात यश मिळवले आहे. या उल्लेखनीय कामगिरीबद्दल कोल्हापूर परिक्षेत्राचे मा. विशेष पोलीस महानिरीक्षक यांच्या हस्ते बार्शी पोलिसांना गौरवपत्र देऊन सन्मानित करण्यात आले.
१७ एप्रिल २०२५ रोजी प्राप्त गोपनीय माहितीच्या आधारे पोलीस निरीक्षक श्री. बालाजी कुकडे यांच्या मार्गदर्शनाखाली परांडा रोड येथील पेट्रोल पंपाजवळ सापळा रचून अंमली पदार्थ (मॅफेड्रॉन – एम.डी.) विक्री करणाऱ्या टोळीवर कारवाई करण्यात आली. या वेळी तीन आरोपींना अटक करून २०.०४ ग्रॅम मॅफेड्रॉन, गावठी पिस्तूल, तीन जिवंत काडतुसे, मोबाईल्स, वजन काटा, रोख रक्कम व टोयोटा कार असा एकूण १८ लाखांचा मुद्देमाल जप्त करण्यात आला.
तांत्रिक विश्लेषणाद्वारे तपास पुढे नेल्यावर एकूण १३ आरोपींमध्ये टोळी कार्यरत असल्याचे निष्पन्न झाले असून त्यातील १० जणांना अटक करण्यात आली आहे. आरोपींविरुद्ध एनडीपीएस कायदा, भादंवि व महाराष्ट्र पोलीस अधिनियम अंतर्गत गुन्हे दाखल करण्यात आले असून दोषारोपपत्र न्यायालयात सादर करण्यात आले आहे.
या यशस्वी व प्रभावी तपासामुळे अमली पदार्थविरोधी अभियानास मोठा बळ मिळाला असून पोलीस दलाच्या दक्षतेचे व कार्यक्षमतेचे हे ठळक उदाहरण ठरले आहे.
About the Author
