*ડાંગ LCBની મોટી કાર્યવાહી: વરસતા વરસાદે ફિલ્મી ઢબે પીછો કરી વિદેશી દારૂના જથ્થા સાથે યુ.પી. અને સેલવાસના બે બુટલેગરોને ઝડપ્યા*
*ડાંગ-આહવા:*
સુરત રેન્જના મહેરબાન પોલીસ મહાનિરીક્ષક શ્રી પ્રેમવીરસિંહ સાહેબ (IPS) નાઓએ પ્રોહીબીશન તેમજ જુગાર જેવી ગેરકાયદેસર પ્રવૃત્તિઓ નેસ્તનાબૂદ કરવા કરેલી સૂચના અન્વયે ડાંગ-આહવા જિલ્લા પોલીસ અધીક્ષક શ્રી પૂજા યાદવ સાહેબના સીધા માર્ગદર્શન હેઠળ લોકલ ક્રાઇમ બ્રાન્ચ (LCB) ની ટીમ પેટ્રોલિંગમાં હતી. તે દરમિયાન એલ.સી.બી.ના પોલીસ સબ ઇન્સ્પેક્ટર શ્રી જે.જી.અનડકટ અને તેમની ટીમને ખાનગી રાહે પાકી બાતમી મળી હતી કે, એક શંકાસ્પદ સફેદ કલરની અર્બન ક્રૂઝર ફોર વ્હીલ ગાડી (નંબર DD પાસીંગ) વાંસદા તરફથી વઘઈ-આહવા રોડ ઉપર આવી રહી છે.
બાતમીના આધારે એલ.સી.બી.ની ટીમે તુરંત વઘઈ તરફ રવાના થઈને કુકડનખી ગામ પાસે એસ.એસ. માહલા કેમ્પસ નજીકના વળાંકમાં વોચ ગોઠવી હતી. આ દરમિયાન બાતમી વાળી ગાડી પુરઝડપે સામેની સાઇડથી આવતા પોલીસે તેને રોકવાનો પ્રયાસ કર્યો હતો. જોકે, ચાલકે ગાડી ઊભી રાખવાને બદલે ત્યાંથી ભગાડી મૂકી હતી, જેથી પોલીસે તુરંત જ યુ-ટર્ન મારીને વરસતા વરસાદમાં પણ તે ગાડીનો પીછો કર્યો હતો.
પોલીસથી બચવા માટે બુટલેગરે મુખ્ય રોડ છોડી કાચા રસ્તે જંગલ તરફ ગાડી હંકારી મૂકી હતી, જ્યાં કાબૂ ગુમાવતા સફેદ કલરની અર્બન ક્રૂઝર કાર જંગલમાં ખાડામાં પલટી મારી ગઈ હતી. કાર પલટી મારી જતાં જ તેમાંથી બે ઇસમો નીકળીને ભાગવા લાગ્યા હતા, પરંતુ એલ.સી.બી.ની ટીમે સજાગતા દાખવી તેઓને કોર્ડન કરી ઘટનાસ્થળે જ ઝડપી પાડ્યા હતા.
પોલીસે ક્રેનની મદદથી ખાડામાંથી કાર બહાર કઢાવી હતી. ગાડીની અંદર તેમજ આજુબાજુ તપાસ કરતા તેમાંથી નાની-મોટી વિદેશી દારૂની બોટલો નંગ-૫૪ તથા બીયર ટીન નંગ-૨૮ મળી આવ્યા હતા. પોલીસે દારૂ, રૂ. ૫,૦૦,૦૦૦/- ની કિંમતની કાર અને રૂ. ૧૦,૦૦૦/- ના બે મોબાઈલ ફોન મળી **કુલ રૂ. ૫,૪૩,૪૨૪/- નો મુદ્દામાલ** જપ્ત કર્યો છે અને બંને આરોપીઓને આગળની કાર્યવાહી માટે વઘઈ પોલીસ સ્ટેશન સોંપવામાં આવ્યા છે.
*પકડાયેલ આરોપીઓની વિગત:*
૧. *અજયકુમાર રાકેશ પાન્ડેય* (ઉ.વ. ૨૬), મૂળ રહે. ચિંતવ, ભટેવરા મછલી શહેર, જૌનપુર, ઉત્તર પ્રદેશ (હાલ રહે. રૂમ નં. ૩૦૪, અંબિકા પાર્ક, લવાછા, તા. વાપી, જિ. વલસાડ).
૨. *રાજેન્દ્રસિંગ નર્મદાસિંગ દીક્ષીત* (ઉ.વ. ૬૩), રહે. રૂમ નં. ૩૦૨, વ્રજ દર્શન કોમ્પ્લેક્ષની સામે, જૈન મંદિર, દાદરા નગર હવેલી.
*કામગીરી કરનાર પોલીસ ટીમ:*
આ સફળ ઓપરેશનમાં PSI શ્રી જે.જી.અનડકટ, ASI રમેશભાઈ બાળુભાઈ, ASI પ્રમોદભાઈ ગનસુભાઈ, HC દિનેશભાઈ પાંડુભાઈ, PC અશોકભાઈ મગનભાઈ, PC ચંદુભાઈ રાજલભાઈ અને ડ્રા.ASI રામદાસભાઈ લખુભાઈ જોડાયા હતા.
About the Author
