*ડાંગ ના જામનવિહિર ગામે તાલુકા પંચાયત પ્રમુખના નિવાસસ્થાને ચોરીનો પ્રયાસ નિષ્ફળ, ગ્રામજનો જાગી જતા શંકાસ્પદો ફરાર*
*રિપોર્ટર: ઝાકિર ઝંકાર, આહવા (ડાંગ)*
ડાંગ જિલ્લાના આહવા તાલુકાના જામનવિહિર ગામમાં આહવા તાલુકા પંચાયતના પ્રમુખના નિવાસસ્થાને રાત્રિના સમયે ચોરીનો પ્રયાસ નિષ્ફળ ગયો હોવાની ઘટના સામે આવી છે. ઘટનાને પગલે સમગ્ર ગામમાં ચકચાર મચી ગઈ હતી.
પ્રાપ્ત માહિતી મુજબ, મોડી રાત્રે કેટલાક શંકાસ્પદ ઇસમો ચોરીના ઇરાદે ગામમાં ઘૂસ્યા હતા. તેમની હિલચાલ દરમિયાન અવાજ થતાં ગ્રામજનો સતર્ક બની તાત્કાલિક બહાર દોડી આવ્યા હતા. ગ્રામજનો એકત્ર થઈ જતા શંકાસ્પદો ગભરાઈને સ્થળ પરથી ફરાર થઈ ગયા હતા.
ફરાર થતા પહેલાં શંકાસ્પદોએ એક કારનો કાચ તોડી નુકસાન પહોંચાડ્યું હોવાનું પણ સ્થાનિકો દ્વારા જણાવવામાં આવ્યું છે. ઘટનાને કારણે ગ્રામજનોમાં ભય અને ચિંતાનો માહોલ સર્જાયો હતો.
ઘટનાની જાણ તાત્કાલિક પોલીસને કરવામાં આવતાં પોલીસ ઘટનાસ્થળે પહોંચી હતી અને સમગ્ર મામલે તપાસ હાથ ધરી છે. શંકાસ્પદોની ઓળખ કરી તેમને ઝડપવા માટે પોલીસે વિવિધ દિશામાં તપાસ શરૂ કરી હોવાનું જાણવા મળ્યું છે.
આ ઘટનાને પગલે ગ્રામજનોએ રાત્રિના સમયે પોલીસ પેટ્રોલિંગ વધારવાની, શંકાસ્પદ તત્વો સામે કડક કાર્યવાહી કરવાની તેમજ ગામોમાં સુરક્ષા વ્યવસ્થા વધુ મજબૂત બનાવવાની માંગ ઉઠાવી છે.
About the Author
