લોડ સેટિંગના બહાને જ્યોતિગ્રામનો વીજ પુરવઠો બંધ થતો હોવાની રજૂઆત; ખેડૂતોની મુશ્કેલીઓ દૂર કરવાની માંગ
જૂનાગઢ: જૂનાગઢ જિલ્લામાં ખેતીવાડી વીજ પુરવઠામાં વારંવાર થતા કાપ અને જ્યોતિગ્રામ વીજ પુરવઠાને લગતી સમસ્યાઓના મુદ્દે ધારાસભ્ય ગોપાલ ઇટાલિયાના નેતૃત્વમાં વીજ વિભાગ સમક્ષ રજૂઆત કરવામાં આવી હતી.
ધારાસભ્ય ગોપાલ ઇટાલિયાના નેતૃત્વમાં તથા સંગઠન પ્રભારી રાજુભાઈ બોરખતરીયાની ઉપસ્થિતિમાં જિલ્લા અને તાલુકા પંચાયતના સભ્યોની ટીમે વીજ વિભાગની કચેરીએ પહોંચીને ખેડૂતો અને ગ્રામજનોને પડતી મુશ્કેલીઓ અંગે તંત્રનું ધ્યાન દોર્યું હતું.
રજૂઆતમાં ખેતીવાડી વીજ પુરવઠામાં વારંવાર વીજકાપ થતો હોવાની સાથે નવરાત્રિ દરમિયાન લોડ સેટિંગના બહાને જ્યોતિગ્રામનો વીજ પુરવઠો બંધ થતો હોવાની સમસ્યા પણ ઉઠાવવામાં આવી હતી. વીજ પુરવઠાની અનિયમિતતાને કારણે ખેડૂતો અને ગ્રામજનોને પડતી મુશ્કેલીઓનું નિરાકરણ લાવવા માંગ કરવામાં આવી હતી.
ખેડૂતોને ખેતી માટે નિયમિત અને પૂરતો વીજ પુરવઠો મળી રહે તેમજ ગ્રામ્ય વિસ્તારોમાં જ્યોતિગ્રામ યોજના હેઠળ વીજળીનો પુરવઠો સુચારુ રહે તે માટે જરૂરી પગલાં ભરવામાં આવે તેવી રજૂઆત કરવામાં આવી હતી.
હવે વીજ વિભાગ દ્વારા આ રજૂઆતને પગલે શું કાર્યવાહી કરવામાં આવે છે અને ખેડૂતો તથા ગ્રામજનોની વીજળી સંબંધિત સમસ્યાઓનું કેટલું નિરાકરણ આવે છે તેના પર સૌની નજર રહેશે.
About the Author
