મોડાસા શહેરની સર્વવિખ્યાત, સ્થાપિત અને પ્રતિષ્ઠિત શૈક્ષણિક સંસ્થા “મખદૂમ હાઈસ્કૂલ” વર્ષો સુધી પોતાના શૈક્ષણિક યોગદાન માટે જાણીતી રહી છે. સમાજના વડીલોની આગવી દૃષ્ટિ, મહેનત અને સમર્પણથી ઉભી થયેલી આ શાળા લાખો વિદ્યાર્થીઓના જીવનમાં ઉજાસ લાવતી રહી છે. આજ સુધીના અહેવાલ મુજબ અહીંથી અનેક ડોક્ટરો, એન્જિનિયરો, પ્રશાસક અને દેશ-વિદેશમાં યશ મેળવનારા વિદ્યાર્થીઓ નીકળ્યા છે. “મખદૂમ હાઈસ્કૂલ” માત્ર એક શૈક્ષણિક સંસ્થા નથી – તે સમાજના વિકાસ અને ઉન્નતિ માટે સ્થિર કરેલી એક સ્થાપનાત્મક ઈમારત છે, જેનું પાયાનું મૂલ્ય જ ‘વિદ્યા અને ન્યાય’ છે.
દુઃખદ વાસ્તવિકતા એ છે કે આજે આ જ સંસ્થા કેટલાક મુઠ્ઠીભર રાજકીય તત્વોના સ્વાર્થના કારણે પીડાઈ રહી છે. કેટલીક ચતુર રાજકીય વ્યક્તિઓ પોતાના અંગત લાભ માટે શાળાની પરંપરાગત શૈક્ષણિક ગૌરવને રાજકારણનો અખાડો બનાવી રહી છે. આ તત્વો શિક્ષણની પવિત્રતા સાથે ચેડાં કરીને પોતાના રાજકીય ઉદ્દેશને સિદ્ધ કરવા માટે નિર્દોષ વિદ્યાર્થીઓના ભવિષ્ય સાથે ખેલ રમે છે. તેઓ શાળાના સંચાલનને પોતાના નિયંત્રણમાં લેવા માટે જુસ્સાપૂર્વક પ્રયાસ કરે છે, જેથી તે શાળા નહીં, તેમના રાજકીય એજન્ડાનું સાધન બની જાય.
વિચિત્ર અને અત્યંત શરમજનક વાત એ છે કે, આવા લોકોના પોતાના સંતાનો મખદૂમ હાઈસ્કૂલમાં અભ્યાસ પણ કરતા નથી – તેઓ તો મોંઘી અંગ્રેજી ખાનગી શાળાઓમાં ભણાવવામાં આવે છે. તેઓ ફક્ત સમાજની આ પ્રતિષ્ઠિત સંસ્થાને પોતાની વ્યક્તિગત જાગીર સમજીને મનમાની વહીવટ કરે છે. આજે આ પ્રશ્ન સમગ્ર સમાજના મર્મને સ્પર્શે છે – કે આવા તત્વો શું સિદ્ધ કરવા માંગે છે? તેઓ શાળાને રાજકારણનો અડ્ડો બનાવી સમાજને શું સંદેશ આપવી માંગે છે?
આમ તો, મખદૂમ હાઈસ્કૂલ એક મુસ્લિમ ટ્રસ્ટ દ્વારા સંચાલિત પ્રમાણભૂત શૈક્ષણિક સંસ્થા છે. તેમાં કોઈ પણ જાતનો રાજકીય હસ્તક્ષેપ સમગ્ર સમુદાયના ભવિષ્ય માટે ખતરનાક સાબિત થઈ શકે છે. સમાજના વડીલોની સુઝબૂઝ અને વર્ષો જૂની મહેનતથી ઊભી થયેલી આ શાળા આજે ધીરે ધીરે લોભી તત્વોના હાથે અંધકાર તરફ ધકેલાઈ રહી છે.
હવે સમય આવી ગયો છે કે મોડાસાના જાગૃત નાગરિકો, વાલીઓ, પૂર્વ વિદ્યાર્થીગણ અને સામાજિક આગેવાનો મજબૂત અવાજ ઊભો કરે. આવા રાજકીય તત્વો માટે સ્પષ્ટ સંદેશ આપવો પડશે:
“NO POLITICIAN ALLOWED HERE.”
શાળાનું શૈક્ષણિક વાતાવરણ શુદ્ધ રાખવા માટે એક નિષ્ઠાવાન, નિઃસ્વાર્થ અને કાયદેસર શૈક્ષણિક કમિટીની રચના જરૂરી છે – જેનો એકમાત્ર ધ્યેય વિદ્યાર્થીઓનું ભવિષ્ય અને ગુણવત્તાયુક્ત શિક્ષણ હશે.
આ શાળા માત્ર ભૂતકાળના ગૌરવ માટે નહીં, પણ ભવિષ્યની પેઢી માટે પણ પવિત્ર છે.
આવો, સૌ એકજ સંકલ્પ કરીએ – મખદૂમ હાઈસ્કૂલને રાજકારણમુક્ત બનાવી, શિક્ષણની પવિત્રતાને બચાવીએ.
સાકીર ટીટોઇયા
ઇન્ડિયન ન્યુઝ ટીવી
About the Author
