*અનુદાનના અભાવે ડાંગ જિલ્લામાં માતા-શિશુ સેવા પર બ્રેક*
*4માંથી 2 વાન બંધ થતાં ખિલખિલાટ સેવા પ્રભાવિત, વધારાની ગ્રાન્ટ ફાળવવાની માંગ ઉઠી*
રિપોર્ટ :
*ઝાકિર ઝંકાર*: આહવા, તા. 17
ડાંગ જિલ્લામાં માતાઓ અને નવજાત શિશુઓને હોસ્પિટલમાંથી સુરક્ષિત રીતે ઘરે પહોંચાડતી “ખિલખિલાટ” સેવા અનુદાનના અભાવે અધૂરી બની ગઈ છે. અગાઉ જિલ્લામાં સરળતાથી ચાલી રહેલી આ સેવા હવે અંશતઃ બંધ થવાથી ગ્રામિણ અને અંતરિયાળ વિસ્તારોમાં રહેતી મહિલાઓને મુશ્કેલીઓનો સામનો કરવો પડી રહ્યો છે.
અહેવાલો મુજબ, જિલ્લામાં ચાલી રહેલી 4 વાનમાંથી 2 વાન અચાનક બંધ કરી દેવામાં આવી છે. પરિણામે બાકીની 2 વાન પર ભાર વધ્યો છે અને હોસ્પિટલમાંથી રજા મળ્યા બાદ માતા અને બાળકને ઘરે પહોંચાડવામાં વિલંબ થતો હોવાનું જાણવા મળે છે.
આ સેવા હેઠળ સરકારી હોસ્પિટલોમાં પ્રસૂતિ બાદ માતા અને નવજાત શિશુને મફતમાં તેમના નિવાસસ્થાને પહોંચાડવાની સુવિધા આપવામાં આવતી હતી. ખાસ કરીને ડાંગ જેવા પહાડી અને અંતરિયાળ જિલ્લામાં રહેતી બહેનો માટે આ સેવા વરદાનરૂપ સાબિત થઈ હતી.
પરંતુ અનુદાનના અભાવે Subir સ્થિત CHC, Pipari સ્થિત PHC તથા અન્ય વિસ્તારોને આવરી લેતી વાન સેવાઓ રોકી દેવામાં આવતા માતૃત્વ અને બાળ સુરક્ષા સેવાઓ પ્રશ્નાર્થ હેઠળ આવી છે.
જિલ્લામાં જન્મદર ઊંચો હોવા છતાં વાહનોની સંખ્યામાં ઘટાડો થવાથી આરોગ્ય સેવાઓ પર નકારાત્મક અસર પડી રહી છે. અંતરિયાળ ગામોમાં રહેતા પરિવારો માટે હોસ્પિટલથી ઘરે પરત ફરવું હવે વધુ કઠિન બન્યું છે.
આંતરિક સૂત્રોના જણાવ્યા મુજબ, ફાળવવામાં આવતી ગ્રાન્ટમાં ઘટાડો થતાં આ નિર્ણય લેવાયો છે. સ્થાનિક નાગરિકો અને સામાજિક આગેવાનો દ્વારા બંધ કરવામાં આવેલી 2 વાનની સેવા તાત્કાલિક પુનઃશરૂ કરવા તેમજ વધારાની ગ્રાન્ટ ફાળવવાની માંગ ઉઠી રહી છે.
જિલ્લાવાસીઓનું કહેવું છે કે માતા અને બાળકની સુરક્ષા સાથે જોડાયેલી આવી જીવનરક્ષક સેવાઓમાં કોઈપણ પ્રકારનો વિક્ષેપ ન આવવો જોઈએ અને સરકાર દ્વારા તાત્કાલિક યોગ્ય પગલાં લેવામાં આવે.
About the Author
