ਕਪੂਰਗੜ੍ਹ ਵਿਖੇ ਪ੍ਰਾਚੀਨ ਲਕਸ਼ਮੀ ਨਰਾਇਣ ਮੰਦਰ ਦੇ ਜੀਰਨੋਧਾਰ ਲਈ 51 ਹਜ਼ਾਰ ਰੁਪਏ ਦੀ ਸਹਾਇਤਾ ਪ੍ਰਦਾਨ
ਅਮਲੋਹ(ਅਜੇ ਕੁਮਾਰ)
ਅਮਲੋਹ ਦੇ ਨੇੜਲੇ ਪਿੰਡ ਕਪੂਰਗੜ੍ਹ ਵਿੱਚ ਸਥਿਤ ਇਤਿਹਾਸਿਕ ਅਤੇ ਧਾਰਮਿਕ ਅਸਥਾਨ ਸ੍ਰੀ ਠਾਕੁਰ ਦੁਆਰਾ ਲਕਸ਼ਮੀ ਨਰਾਇਣ ਮੰਦਰ, ਜੋ ਕਿ ਸਨਾਤਨ ਧਰਮ ਦਾ ਪ੍ਰਤੀਕ ਮੰਨਿਆ ਜਾਂਦਾ ਹੈ, ਦੀ ਨਵੀਂ ਰੂਪ-ਰੇਖਾ ਲਈ ਇਲਾਕਾ ਵਾਸੀਆਂ ਨੂੰ ਅੱਗੇ ਆਉਣ ਦੀ ਅਪੀਲ ਕੀਤੀ ਗਈ ਹੈ। ਇਹ ਮੰਦਰ ਬਿਕਰਮੀ ਸੰਮਤ 1732 ਵਿੱਚ ਨੰਦੀ ਸੰਪਰਦਾਇ ਦੇ ਅਖਾੜਾ ਨਿਰਵਾਣਿਆ ਵੱਲੋਂ ਤਿਆਰ ਕੀਤਾ ਗਿਆ ਸੀ ਅਤੇ ਉਸ ਸਮੇਂ ਮਹੰਤ ਸ੍ਰੀ ਕ੍ਰਿਸ਼ਨ ਦਾਸ ਜੀ ਨੇ ਇੱਥੇ ਕਠਿਨ ਤਪੱਸਿਆ ਕੀਤੀ ਸੀ।
ਮੌਜੂਦਾ ਸਮੇਂ ਮੰਦਰ ਦੀ ਗੱਦੀ ਦੀ ਸੇਵਾ ਮਹੰਤ ਸ੍ਰੀ ਕੌਰ ਦਾਸ ਜੀ ਸੰਭਾਲ ਰਹੇ ਹਨ, ਜਿਨ੍ਹਾਂ ਨੂੰ ਸ੍ਰੀ ਬਲਵਿੰਦਰ ਸਿੰਘ ਜੀ ਵੱਲੋਂ ਪੂਰਾ ਸਹਿਯੋਗ ਦਿੱਤਾ ਜਾ ਰਿਹਾ ਹੈ। ਮਹੰਤ ਕੌਰ ਦਾਸ ਜੀ ਨੇ ਦੱਸਿਆ ਕਿ ਕਰੀਬ 250 ਸਾਲ ਪੁਰਾਣੇ ਇਸ ਮੰਦਰ ਦੀ ਹਾਲਤ ਖਰਾਬ ਹੋ ਰਹੀ ਹੈ, ਜਿਸ ਕਾਰਨ ਇਸ ਦੇ ਜੀਰਨੋਧਾਰ ਦੀ ਲੋੜ ਹੈ।
ਮੰਦਰ ਦੇ ਮੁੱਖ ਦੁਆਰ ਦੇ ਪੁਨਰਨਿਰਮਾਣ ਲਈ ਅੱਜ ਅਮਲੋਹ ਵਿਖੇ ਸ਼ੈਲਰ ਐਸੋਸੀਏਸ਼ਨ ਦੇ ਪ੍ਰਧਾਨ ਸ੍ਰੀ ਰਾਕੇਸ਼ ਕੁਮਾਰ ਗਰਗ ਜੀ ਵੱਲੋਂ 51,000 ਰੁਪਏ ਦੀ ਆਰਥਿਕ ਸਹਾਇਤਾ ਦਿੱਤੀ ਗਈ। ਇਸ ਮੌਕੇ ਉਨ੍ਹਾਂ ਕਿਹਾ ਕਿ ਇਲਾਕਾ ਨਿਵਾਸੀਆਂ ਨੂੰ ਆਪਣੀ ਨੇਕ ਕਮਾਈ ਵਿੱਚੋਂ ਹਿੱਸਾ ਪਾ ਕੇ ਇਸ ਪ੍ਰਾਚੀਨ ਧਾਰਮਿਕ ਅਸਥਾਨ ਦੇ ਨਵੀਂ ਤਰ੍ਹਾਂ ਨਿਰਮਾਣ ਵਿੱਚ ਯੋਗਦਾਨ ਪਾਉਣਾ ਚਾਹੀਦਾ ਹੈ।
ਇਸ ਦੌਰਾਨ ਮੰਦਰ ਦੇ ਸੇਵਾਦਾਰ ਸ੍ਰੀ ਬਲਵਿੰਦਰ ਸਿੰਘ ਜੀ ਨੇ ਦੱਸਿਆ ਕਿ ਮੰਦਰ ਨਾਲ ਸੰਬੰਧਿਤ ਲਗਭਗ 10 ਕਿਲੇ ਜ਼ਮੀਨ ‘ਤੇ ਕੁਝ ਤਾਕਤਵਰ ਲੋਕਾਂ ਵੱਲੋਂ ਕਬਜ਼ਾ ਕੀਤਾ ਹੋਇਆ ਹੈ। ਮੰਦਰ ਕਮੇਟੀ ਇਹ ਮਾਮਲਾ ਮਾਨਯੋਗ ਅਦਾਲਤ ਵਿੱਚ ਜਿੱਤ ਚੁੱਕੀ ਹੈ, ਪਰ ਹਾਲੇ ਤੱਕ ਕਬਜ਼ਾ ਨਹੀਂ ਮਿਲ ਸਕਿਆ। ਇਸ ਸੰਬੰਧੀ ਪੁਲਿਸ ਪ੍ਰਸ਼ਾਸਨ ਤੋਂ ਮਦਦ ਦੀ ਮੰਗ ਕੀਤੀ ਗਈ ਹੈ, ਪਰ ਅਜੇ ਤੱਕ ਕੋਈ ਢੰਗ ਦੀ ਕਾਰਵਾਈ ਨਹੀਂ ਹੋਈ।
ਉਨ੍ਹਾਂ ਸਰਕਾਰ ਤੋਂ ਮੰਗ ਕੀਤੀ ਕਿ ਕਬਜ਼ਾਧਾਰੀਆਂ ਤੋਂ ਜ਼ਮੀਨ ਖਾਲੀ ਕਰਵਾ ਕੇ ਮੰਦਰ ਕਮੇਟੀ ਨੂੰ ਸੌਂਪੀ ਜਾਵੇ ਅਤੇ ਦੋਸ਼ੀਆਂ ਖ਼ਿਲਾਫ਼ ਕਾਨੂੰਨੀ ਕਾਰਵਾਈ ਕੀਤੀ ਜਾਵੇ।
ਇਸ ਮੌਕੇ ਭਾਰਤੀ ਜਨਤਾ ਪਾਰਟੀ ਪੰਜਾਬ ਦੇ ਸੂਬਾ ਕਾਰਜਕਾਰਨੀ ਮੈਂਬਰ ਪ੍ਰਦੀਪ ਗਰਗ, ਅਮਲੋਹ ਦੇ ਮੰਡਲ ਪ੍ਰਧਾਨ ਸ੍ਰੀ ਰਾਕੇਸ਼ ਕੁਮਾਰ ਬਬਲੀ, ਐਡਵੋਕੇਟ ਮਿਯੰਕ ਸ਼ਰਮਾ, ਐਡਵੋਕੇਟ ਮੋਹਿਤ ਗਰਗ, ਆਰ.ਐਸ.ਐਸ. ਦੇ ਸੰਘਚਾਲਕ ਸ੍ਰੀ ਰਾਜਪਾਲ ਗਰਗ, ਅਗਰਵਾਲ ਸਭਾ ਦੇ ਸ੍ਰੀ ਸ਼ਿਵ ਕੁਮਾਰ ਗੋਇਲ, ਕੁਨਾਲ ਗਰਗ ਅਤੇ ਸਤਿਨਾਮ ਸਾਹੂ ਸਮੇਤ ਕਈ ਹੋਰ ਪ੍ਰਮੁੱਖ ਸ਼ਖਸੀਅਤਾਂ ਮੌਜੂਦ ਸਨ।
About the Author
