*મહેસૂલી કર્મચારીઓની પડતર માંગણીઓ મુદ્દે ડાંગ જિલ્લા મંડળની સરકારને રજૂઆત*
*બદલીમાં થયેલા અન્યાય અને વધારાની કામગીરી સામે કર્મચારીઓમાં રોષ, માંગણીઓ નહીં સંતોષાય તો આંદોલનની ચીમકી*
*રિપોર્ટર: ઝાકિર ઝંકાર,ડાંગ આહવા*
ડાંગ જિલ્લામાં મહેસૂલી કર્મચારીઓની બદલી, બઢતી અને વધારાની કામગીરી સહિતના વિવિધ પડતર પ્રશ્નોને લઈને ડાંગ જિલ્લા મહેસૂલી કર્મચારી મંડળ (વર્ગ-3), આહવા દ્વારા રાજ્ય સરકાર સમક્ષ રજૂઆત કરવામાં આવી છે.
મંડળ દ્વારા મુખ્યમંત્રી, મહેસૂલ મંત્રી તથા મહેસૂલ વિભાગના ઉચ્ચ અધિકારીઓને કરાયેલી રજૂઆતમાં જણાવાયું છે કે મહેસૂલ વિભાગ દ્વારા મહેસૂલી કર્મચારીઓ માટે વિવિધ કામગીરી સોંપવામાં આવી રહી છે, જેના કારણે કર્મચારીઓ પર કામનું ભારણ વધી રહ્યું છે. ખાસ કરીને E-Dhara, Digital Gujarat, Sugam સહિતના પોર્ટલની કામગીરી, OTP તથા Thumb/Biometric આધારિત કામગીરીને કારણે કર્મચારીઓને માનસિક તણાવ અનુભવાતો હોવાનો આક્ષેપ કરવામાં આવ્યો છે.
મંડળે મહેસૂલી તલાટીઓના જોબ ચાર્ટમાં અન્ય વિભાગની કામગીરી સામેલ કરવાના નિર્ણય સામે પણ વાંધો વ્યક્ત કર્યો છે. કર્મચારીઓના જણાવ્યા મુજબ, તેમની મૂળ મહેસૂલી કામગીરી ઉપરાંત વધારાની કામગીરી સોંપાતા નિયમિત કામગીરી પર પણ અસર થઈ રહી છે.
રજૂઆતમાં બદલી-બઢતીમાં થયેલા અન્યાયને દૂર કરવા, વર્ષ 2020ના Re-Adjustment Dateનો લાભ આપવા, નવી ભરતી પહેલાંથી ફરજ બજાવતા કર્મચારીઓને મામલતદાર સંવર્ગમાં તક આપવા તથા 2021 બાદની બઢતી અને નિમણૂક સંબંધિત પ્રશ્નો ઉકેલવા માંગ કરવામાં આવી છે.
આ ઉપરાંત જિલ્લા કક્ષાએ કર્મચારીઓની બદલીમાં પારદર્શિતા જાળવવા, જરૂરી જગ્યાઓ ખાલી રાખીને બદલીના હુકમો ન કરવા અને કર્મચારીઓની સિનિયોરિટી તથા હક-હિતને ધ્યાનમાં રાખીને નિર્ણય લેવા પણ માંગ કરાઈ છે.
દરમિયાન ગુજરાત રાજ્ય મહેસૂલી કર્મચારી મહામંડળે પણ રાજ્યવ્યાપી ‘Work to Rule’ કાર્યક્રમ જાહેર કર્યો છે. તાજેતરના અહેવાલો મુજબ મહેસૂલી તલાટી સહિતના કર્મચારીઓ નવા જોબ ચાર્ટ અને અન્ય પડતર પ્રશ્નો સામે વિરોધ નોંધાવી રહ્યા છે.
ડાંગ જિલ્લા મહેસૂલી કર્મચારી મંડળે સ્પષ્ટતા કરી છે કે કર્મચારીઓની રજૂઆતોનો યોગ્ય ઉકેલ નહીં આવે તો આગામી દિવસોમાં સંગઠનાત્મક રીતે વધુ કડક કાર્યક્રમો હાથ ધરવામાં આવી શકે છે. રાજ્યવ્યાપી આંદોલન માટે 10 સપ્ટેમ્બરથી હડતાળની ચીમકી પણ જાહેર થયાના અહેવાલો છે.
હવે જોવાનું એ રહેશે કે મહેસૂલ વિભાગ કર્મચારીઓની પડતર માંગણીઓ અંગે શું નિર્ણય લે છે અને આગામી દિવસોમાં આ મુદ્દો કયા સ્વરૂપે આગળ વધે છે.
About the Author
