*વાઘમાળ ગામે ‘તમાશા પાર્ટી’ દ્વારા લોકશૈલીમાં વન્યજીવ સંરક્ષણ અને પર્યાવરણ જાગૃતિનો અનોખો સંદેશ અપાયો*
*રિપોર્ટર ; ઝાકિર ઝંકાર , ડાંગ (વધઈ)*
ડાંગ જિલ્લાના વઘઈ તાલુકાની સાકરપાતળ રેન્જ અંતર્ગત આવતા વાઘમાળ ગામે લોકકલા અને મનોરંજનના માધ્યમથી પર્યાવરણ અને વન્યજીવ સંરક્ષણનો અનોખો સંદેશ આપવા માટે ‘તમાશા પાર્ટી’ ના કાર્યક્રમનું ભવ્ય આયોજન કરવામાં આવ્યું હતું. લોકભોગ્ય શૈલીમાં રજૂ થયેલા આ કાર્યક્રમે ગ્રામજનોમાં વિશેષ આકર્ષણ જગાવ્યું હતું.
આ વિશેષ જાગૃતિ કાર્યક્રમમાં સાકરપાતળ રેન્જના આર.એફ.ઓ. (RFO) સાહેબ તેમજ ડાંગ જિલ્લા પંચાયતના સદસ્ય નિતેશભાઈ ચૌધરી વિશેષ ઉપસ્થિત રહ્યા હતા. વન વિભાગના અધિકારીઓ અને લોકપ્રતિનિધિઓની ઉપસ્થિતિએ ગ્રામજનોનો ઉત્સાહ બેવડાવ્યો હતો.
કાર્યક્રમ દરમિયાન કલાકારો દ્વારા ‘તમાશા’ ના માધ્યમથી જંગલોનું જતન, વન્યજીવોનું રક્ષણ, વૃક્ષારોપણનું મહત્વ અને પર્યાવરણ સંતુલન જેવા ગંભીર વિષયોને અત્યંત રસપ્રદ અને લોકભોગ્ય રીતે રજૂ કરવામાં આવ્યા હતા. આ મનોરંજક પ્રસ્તુતિ દ્વારા ઉપસ્થિત ગ્રામજનોને વન અને વન્ય સંપદા પ્રત્યે પોતાની નૈતિક જવાબદારી સમજાવવામાં આવી હતી.
વાઘમાળ ગામ અને આસપાસના વિસ્તારમાંથી મોટી સંખ્યામાં ગ્રામજનોએ હાજરી આપી આ જાગૃતિ અભિયાનનો ભરપૂર લાભ લીધો હતો. લોકશૈલીમાં આપવામાં આવેલા આ સંદેશને ગ્રામજનોએ હર્ષોલ્લાસ સાથે વધાવી લીધો હતો અને ભવિષ્યમાં પણ પર્યાવરણ તથા વન્યજીવ સંરક્ષણમાં સહયોગ આપવાની પ્રતિબદ્ધતા વ્યક્ત કરી હતી.
About the Author
