*પ્રાસંગિક : ડાંગની પ્રાકૃતિક, સાંસ્કૃતિક અને પારંપરિક વિરાસતનો અનોખો પ્રવાસન વૈભવ*
*સાપુતારાથી ગીરાધોધ સુધી કુદરતી સૌંદર્ય, જળધોધો, જંગલો અને ધાર્મિક સ્થળો પ્રવાસીઓને આકર્ષે છે*
*રિપોર્ટર ; ઝાકિર ઝંકાર , આહવા ડાંગ*
પ્રકૃતિપ્રેમીઓ માટે ડાંગ જિલ્લો કુદરતી સૌંદર્ય, જૈવ વિવિધતા, આદિવાસી સંસ્કૃતિ અને ધાર્મિક-પૌરાણિક સ્થળોનો અનોખો સંગમ છે. ખાસ કરીને ચોમાસાની ઋતુમાં ડાંગની હરિયાળી, ધોધ અને ધુમ્મસભર્યા પર્વતો પ્રવાસીઓને અનોખો અનુભવ કરાવે છે.
ડાંગનું મુખ્ય પ્રવાસન આકર્ષણ સાપુતારા ગુજરાતનું એકમાત્ર ગિરિમથક છે. સમુદ્ર સપાટીથી આશરે ૧૧૦૦ મીટરની ઊંચાઈએ આવેલા સાપુતારામાં વર્ષ દરમિયાન મોટી સંખ્યામાં પ્રવાસીઓ આવે છે. અહીં વિવિધ ઉત્સવો અને સાહસિક પ્રવૃત્તિઓનું પણ આયોજન થાય છે.
સાપુતારા ઉપરાંત ગીરાધોધ, ગીરમાળ ધોધ, મહાલ વોટરફોલ, બારદા ધોધ, ભેગુ ધોધ સહિતના અનેક જળધોધ ચોમાસામાં પ્રવાસીઓ માટે મુખ્ય આકર્ષણ બને છે. વઘઈ નજીકનો ગીરાધોધ ‘ડાંગના નાયગ્રા’ તરીકે પણ જાણીતો છે.
ડાંગના જંગલો જૈવ વિવિધતાથી સમૃદ્ધ છે. કિલાદ, દેવિનામાળ અને મહાલ ખાતેની ઇકો ટુરિઝમ સાઇટ્સ પ્રકૃતિપ્રેમીઓ માટે આકર્ષણનું કેન્દ્ર બની છે. અહીં વનપરિભ્રમણ, સાહસિક પ્રવૃત્તિઓ અને પ્રકૃતિ શિક્ષણ જેવી પ્રવૃત્તિઓ પણ યોજાય છે.
આ ઉપરાંત પૂર્ણા અભયારણ્ય, વાંસદા નેશનલ પાર્ક, ડોનનું ગીધ સંવર્ધન કેન્દ્ર, શબરીધામ, પંપા સરોવર, અંજનકુંડ સહિતના પ્રાકૃતિક, ધાર્મિક અને પૌરાણિક સ્થળો પણ ડાંગના પ્રવાસન વૈભવમાં વધારો કરે છે.
ડાંગની વિશિષ્ટ આદિવાસી સંસ્કૃતિ, પરંપરાગત જીવનશૈલી, વનસ્પતિ, ઔષધીય વનસ્પતિ, વિવિધ પક્ષીઓ, પતંગિયાં અને વન્યજીવો પ્રકૃતિપ્રેમીઓ માટે વિશેષ આકર્ષણ છે. રાજ્ય સરકાર અને જિલ્લા પ્રશાસન દ્વારા ઇકો ટુરિઝમને પ્રોત્સાહન આપી સ્થાનિક રોજગારીના સર્જન માટે પણ પ્રયાસો કરવામાં આવી રહ્યા છે.
આમ, પ્રાકૃતિક, સાંસ્કૃતિક અને પારંપરિક વિરાસતનો ત્રિવેણી સંગમ સમો ડાંગ જિલ્લો પ્રવાસીઓને જોવા, જાણવા અને માણવા માટે અનેકવિધ અનુભવો પ્રદાન કરે છે. જોકે ડાંગની નૈસર્ગિક સુંદરતા જળવાઈ રહે તે માટે પ્રવાસીઓએ પર્યાવરણની કાળજી રાખી પ્લાસ્ટિકનો ઉપયોગ ટાળવો અને ‘નો પ્લાસ્ટિક ઝોન’ના નિયમોનું પાલન કરવું જરૂરી છે.
About the Author
