*અમેરિકાથી સોનાના દાગીના અને કપડાંનું પાર્સલ મોકલવાની લાલચ આપી ₹50 હજારની છેતરપિંડી, સાપુતારા પોલીસે ઝારખંડથી આરોપીને ઝડપી પાડ્યો*
*રિપોર્ટર : ઝાકિર ઝંકાર , ડાંગ સાપુતારા*
ડાંગ: સોશિયલ મીડિયા પર ખોટી ઓળખ બનાવી મિત્રતા કેળવી અમેરિકાથી સોનાના દાગીના અને કપડાંનું પાર્સલ મોકલવાની લાલચ આપી ફરિયાદી પાસેથી રૂ.50 હજાર પડાવી લેવાના સાયબર ફ્રોડના ગુનામાં સાપુતારા પોલીસે ઝારખંડથી એક આરોપીને ઝડપી પાડ્યો છે.
મળતી માહિતી મુજબ, સાપુતારા પોલીસ સ્ટેશનમાં તા. 25 જૂન, 2026ના રોજ ગુનો નોંધાયો હતો. ફરિયાદી સાથે ફેસબુક પર ખોટી ઓળખથી મિત્રતા કરવામાં આવી હતી. ત્યારબાદ આરોપીએ અમેરિકાથી સોનાના દાગીના અને કપડાં મોકલવાના હોવાનું કહી પાર્સલ તથા બિલના ફોટા મોકલી ફરિયાદીને લાલચ આપી હતી. આ પ્રકારે વિશ્વાસમાં લઈ ફરિયાદી પાસેથી કુલ રૂ.50,000 પડાવી લેવામાં આવ્યા હતા.
ગુનાની તપાસ પોલીસ ઈન્સ્પેક્ટર જે.કે. બારીયા દ્વારા હાથ ધરવામાં આવી હતી. આરોપીને ઝડપી પાડવા માટે સાપુતારા પોલીસ ટીમે ટેકનિકલ સોર્સ અને ટેકનિકલ એનાલિસિસનો સહારો લીધો હતો. તપાસ દરમિયાન છેતરપિંડીના નાણાંમાંથી ATM મારફતે ઉપાડ કરવામાં આવ્યો હોવાનું સામે આવ્યું હતું.
ATMમાંથી નાણાં ઉપાડનાર ખાતાધારકની માહિતીના આધારે પોલીસે ઝારખંડ રાજ્યના રામગઢ જિલ્લાના ગોલા પોલીસ સ્ટેશન વિસ્તારમાં આવેલા ચોકાદ ગામ ખાતે કાર્યવાહી કરી આરોપી ક્રિશકુમાર અનુજ મુંડા (ઉં.વ.19)ને ઝડપી પાડ્યો હતો. આરોપીને ડાંગ જિલ્લામાં લાવી સઘન પૂછપરછ બાદ ગુનાના કામે અટકાયત કરી કાયદેસરની કાર્યવાહી હાથ ધરવામાં આવી છે.
પકડાયેલ આરોપીની ઓળખ ક્રિશકુમાર અનુજ મુંડા, રહે. ચોકાદ (કરમાલી ટોલા), પોસ્ટ મગનપુર, થાના ગોલા, જી. રામગઢ, ઝારખંડ તરીકે થઈ છે.
આ સમગ્ર કાર્યવાહી પોલીસ મહાનિરીક્ષક પ્રેમવીરસિંઘ, સુરત વિભાગ, પોલીસ અધિક્ષક પૂજા યાદવ, ના.પો.અધિક્ષક કે.આર. ડિમરી તથા ના.પો.અધિક્ષક જનેશ્વર નલવાયાના માર્ગદર્શન હેઠળ કરવામાં આવી હતી.
કાર્યવાહીમાં સાપુતારા પોલીસ સ્ટેશનના PI જે.કે. બારીયા, PSI બી.બી. પટેલ, ASI તેષભાઈ રામાભાઈ, HC ધર્મેન્દ્રસિંહ નારસંગભાઈ, PC પ્રકાશભાઈ સાધુરામભાઈ, PC દેવ્યંતભાઈ ભરતભાઈ તથા IT Expert સંદિપભાઈ મોહનભાઈ પટેલ જોડાયા હતા.
સોશિયલ મીડિયા પર અજાણ્યા વ્યક્તિઓ દ્વારા કરવામાં આવતી આવી લાલચભરી ઓફરો અને પાર્સલના નામે થતી માંગણીઓથી સાવચેત રહેવું જરૂરી છે. સાયબર ફ્રોડનો ભોગ બન્યા હોય તો તાત્કાલિક પોલીસનો સંપર્ક કરી ફરિયાદ નોંધાવવી જોઈએ.
About the Author
