*વઘઈ વાન ડ્રાઈવર ભરતી પ્રક્રિયા અંગે તપાસની માંગ*
*લેખિત રજૂઆત બાદ ભરતીની સમગ્ર પ્રક્રિયા અને દસ્તાવેજોની ચકાસણી કરવા માંગ, નિયમો તથા મેરિટના આધારે કાર્યવાહી કરવાની રજૂઆત*
*રિપોર્ટર ; ઝાકિર ઝંકાર,*
*ડાંગ,વઘઈ*
વઘઈ તાલુકામાં વાન ડ્રાઈવર ભરતી પ્રક્રિયાને લઈને અરજદાર અખિલનભાઈ સનતભાઈ પવાર દ્વારા જિલ્લા વિકાસ અધિકારી, ડાંગ-આહવાને લેખિત રજૂઆત કરવામાં આવી છે. રજૂઆતમાં તા. 06/08/2025ના રોજ આપવામાં આવેલા ડ્રાઈવર ઓર્ડર સહિત સમગ્ર ભરતી પ્રક્રિયાની નિયમસર ચકાસણી કરી જરૂરી કાર્યવાહી કરવા માંગ કરવામાં આવી છે.
અરજીમાં ભરતી પ્રક્રિયા દરમિયાન અનુસરવામાં આવેલા નિયમો, પસંદગીના માપદંડ, ઉમેદવારોની મેરિટ, અનામતની જોગવાઈઓ તેમજ સંબંધિત દસ્તાવેજોની તપાસ કરવાની રજૂઆત કરવામાં આવી છે. અરજદારે ભરતી પ્રક્રિયા અંગે ઉઠેલા પ્રશ્નોની તટસ્થ તપાસ માટે ઉચ્ચસ્તરીય તપાસ કમિટી નિયુક્ત કરવા અને તપાસના આધારે નિયમસર નિર્ણય લેવા માંગ કરી છે.
રજૂઆતમાં વાન ડ્રાઈવર તરીકે થયેલી પસંદગી અને આપવામાં આવેલા ઓર્ડરની નિયમસંગતતા અંગે પણ સ્પષ્ટતા કરવાની માંગ કરવામાં આવી છે. સાથે જ ભરતીની સંપૂર્ણ ફાઈલ, અરજી કરનાર ઉમેદવારોની વિગતો, મેરિટ લિસ્ટ, પસંદગી પ્રક્રિયાના માપદંડ તથા સંબંધિત અધિકૃત રેકોર્ડની ચકાસણી કરવામાં આવે તેવી રજૂઆત કરાઈ છે.
અરજદારે ડાંગ જિલ્લો આદિવાસી વિસ્તાર ધરાવતો જિલ્લો હોવાથી ભરતીમાં લાગુ પડતી સરકારી જોગવાઈઓ અને અનામતના નિયમોનું યોગ્ય પાલન થાય તથા પાત્ર સ્થાનિક ઉમેદવારોને નિયમ મુજબ મળવાપાત્ર તક મળે તે અંગે પણ ધ્યાન દોર્યું છે.
આ મામલે અરજીમાં રજૂ કરાયેલા મુદ્દાઓની સત્યતા અંગે કોઈ અંતિમ નિષ્કર્ષ કાઢવામાં આવ્યો નથી. હવે જિલ્લા વહીવટી તંત્ર દ્વારા સંબંધિત સત્તાવાર રેકોર્ડ અને દસ્તાવેજોની ચકાસણી કરવામાં આવે તો ભરતી પ્રક્રિયા અંગેની વાસ્તવિક સ્થિતિ સ્પષ્ટ થઈ શકે છે. જો તપાસમાં કોઈ પ્રક્રિયાત્મક ક્ષતિ જણાય તો નિયમો અનુસાર યોગ્ય કાર્યવાહી કરવામાં આવે તેવી અરજદારની માંગ છે.
ભરતી પ્રક્રિયામાં પારદર્શિતા જળવાઈ રહે અને તમામ પાત્ર ઉમેદવારોને સમાન તક મળે તે દિશામાં તંત્ર દ્વારા નિષ્પક્ષ તપાસ અને સત્તાવાર સ્પષ્ટતા કરવામાં આવે તેવી અપેક્ષા સ્થાનિક સ્તરે વ્યક્ત થઈ રહી છે.
About the Author
