*ભવાનદગડમાં ભાઈએ ભાઈની હત્યા કરી: કામ-ધંધો કરવા કહેતા બોલાચાલી બાદ કુહાડીના ઘા ઝીંક્યા*
*રિપોર્ટર ; ઝાકિર ઝંકાર , આહવા | ડાંગ*
ડાંગ જિલ્લાના આહવા તાલુકાના ભવાનદગડ ગામના ઉપલુ ફળિયામાં મંગળવારે સાંજે બે સગા ભાઈઓ વચ્ચે થયેલી બોલાચાલી બાદ એક ભાઈએ બીજા ભાઈ પર કુહાડી વડે હુમલો કરતાં તેનું મોત નીપજ્યાની ઘટના સામે આવી છે.
પોલીસ ફરિયાદ મુજબ, મૃતક ગજેન્દ્રભાઈ રામચંદ્રભાઈ પવાર (ઉં.વ. 28) અને આરોપી રણજીતભાઈ રામચંદ્રભાઈ પવાર (ઉં.વ. 26) સગા ભાઈઓ છે. આરોપી મજૂરી કામ કરીને પરિવારનું ગુજરાન ચલાવતો હતો, જ્યારે મૃતક કામ-ધંધો ન કરતો હોવાના કારણે આરોપીએ તેને કામ કરવા સમજાવ્યો હતો.
તા. 6 ઓક્ટોબરના રોજ સાંજે આશરે 7 વાગ્યે આરોપી મજૂરી કામેથી ઘરે પરત આવ્યો હતો. તે સમયે ઘરે બેઠેલા ભાઈને કામ-ધંધો કરવા અંગે સમજાવતા બંને વચ્ચે બોલાચાલી થઈ હતી. પોલીસ ફરિયાદ અનુસાર, બોલાચાલી દરમિયાન આરોપી ગુસ્સે ભરાઈ ગયો હતો અને ઘરમાં પડેલી વાંસના દંડાવાળી કુહાડી લઈ ભાઈ પર હુમલો કર્યો હતો.
હુમલામાં મૃતકના ચહેરા, માથા, જમણા હાથ, ડાબા ખભા તથા પીઠના ભાગે ગંભીર ઈજાઓ થઈ હતી. ગંભીર ઇજાઓના કારણે ઘટનાસ્થળે જ તેનું મોત નીપજ્યું હોવાનું ફરિયાદમાં જણાવાયું છે.
ઘટનાની જાણ થતાં આહવા પોલીસે સ્થળ પર પહોંચી કાર્યવાહી હાથ ધરી હતી. આ મામલે આહવા પોલીસ સ્ટેશનમાં ગુ.ર.નં. 11219002260593/2026 હેઠળ ભારતીય ન્યાય સંહિતા-2023ની કલમ 103(1) તેમજ ગુજરાત પોલીસ અધિનિયમની કલમ 135 મુજબ ગુનો નોંધવામાં આવ્યો છે.
આ મામલે આહવા પોલીસ સ્ટેશનના પોલીસ ઇન્સ્પેક્ટર શ્રી કે.બી. શાંખલા તપાસ ચલાવી રહ્યા છે. બનાવને પગલે ભવાનદગડ ગામમાં ચકચાર મચી છે.
About the Author
