*પીપલાઈદેવી રેન્જમાં ગેરકાયદેસર લાકડાની હેરાફેરી: નગણ્ય દંડમાં ટ્રેક્ટર અને આરોપીઓ મુક્ત, તપાસની માંગ*
*આહવા | ડાંગ*
ડાંગ જિલ્લાના પીપલાઈદેવી વન રેન્જ વિસ્તારમાં ગેરકાયદેસર લાકડાની હેરાફેરીના એક ગંભીર કેસમાં વન વિભાગની કાર્યવાહી શંકાના ઘેરામાં આવી છે. તારીખ *૦૨ જાન્યુઆરી ૨૦૨૬*ના રોજ મોરજીરા ગામ તરફથી એક ટ્રેક્ટર (MH 41 BR 2997*) ગેરકાયદેસર રીતે લાકડા ભરીને લઈ જવાતું હોવાની માહિતી આધારે પીપલાઈદેવી રેન્જના અધિકારીઓ દ્વારા તેને પકડી રેન્જ ઓફિસ ખાતે લાવવામાં આવ્યું હતું.
આટલા ગંભીર ગુનામાં બહારના રાજ્ય મહારાષ્ટ્રના ત્રણ આરોપીઓ સંડોવાયેલા હોવા છતાં, માત્ર ફોટોગ્રાફી કરીને અને રૂ. *૧૫,૦૦૦/-* જેટલો નગણ્ય દંડ વસૂલી ટ્રેક્ટર સહિત આરોપીઓને જામીન પર તાત્કાલિક મુક્ત કરવામાં આવતા સ્થાનિકોમાં ભારે રોષ જોવા મળી રહ્યો છે. મોટા પ્રમાણમાં લાકડાની હેરાફેરી સામે આટલો ઓછો દંડ અને ઝડપી મુક્તિ અધિકારીઓની મિલીભગત હોવાની શંકા ઊભી કરે છે.
સ્થાનિકોનું કહેવું છે કે ડાંગ જિલ્લાના આદિવાસી લોકો જ્યારે પોતાના ઘરેલુ ઉપયોગ માટે સામાન્ય લાકડું લાવે છે ત્યારે વન વિભાગના કર્મચારીઓ દ્વારા તેમને ભારે હેરાનગતિ કરવામાં આવે છે, જ્યારે બહારથી આવેલા મોટા લાકડાં ચોરો સામે નરમ અને પક્ષપાતી વલણ અપનાવવામાં આવે છે, જે ગંભીર પ્રશ્નો ઉભા કરે છે.
આ ઘટનામાં પકડાયેલ લાકડાની વાસ્તવિક કિંમત કેટલી હતી, તેની યોગ્ય માપણી અને પંચનામું કરવામાં આવ્યું હતું કે નહીં, તેમજ કયા કાયદા હેઠળ આરોપીઓને આટલી ઝડપથી મુક્ત કરવામાં આવ્યા—આ તમામ મુદ્દાઓની નિષ્પક્ષ અને ઉચ્ચસ્તરીય તપાસ કરવાની માંગ ઉઠી છે.
સ્થાનિક નાગરિકો અને પર્યાવરણપ્રેમીઓએ ઉત્તર ડાંગ વન વિભાગના ઉચ્ચ અધિકારીઓને સમગ્ર મામલે તાત્કાલિક તપાસ કરાવી, દોષિત અધિકારીઓ સામે કડક કાર્યવાહી કરવાની માંગ કરી છે. જો યોગ્ય પગલાં નહીં લેવાય તો વન વિભાગ પ્રત્યેનો જનવિશ્વાસ ગંભીર રીતે ખંડિત થવાની ચેતવણી પણ આપવામાં આવી છે.
About the Author
