ડાંગમાં ખૈરના લાકડાથી ભરેલી બોલેરો ઝડપી, રૂ.1.45 લાખનો મુદ્દામાલ જપ્ત

ઝાકિર ઝંકાર
ડાંગ : તા. 02

ડાંગ જિલ્લામાં વન વિભાગે સંયુક્ત ઓપરેશન દરમિયાન ગેરકાયદેસર ખૈરના લાકડાથી ભરેલી મહિન્દ્રા બોલેરો પીકઅપ ઝડપી પાડી હતી. શીંગાણા–ગીરમાળ માર્ગ પર રાત્રિના સમયે વાહન અટકાવતાં ચાલકે ઝડપી હંકારી પલાયન કરવાનો પ્રયાસ કર્યો હતો, પરંતુ વન કર્મચારીઓએ ફિલ્મી ઢબે પીછો કરી વાહન ઘેરી લીધું હતું.

આરોપીઓ અંધારાનો લાભ લઈ વાહન રસ્તા પર છોડી જંગલમાં ફરાર થયા હતા. વાહનમાંથી ખૈરના લાકડાના 22 નંગ (1.617 ઘન મીટર) જપ્ત કરવામાં આવ્યા, જેની કિંમત આશરે રૂ.1.45 લાખ આંકવામાં આવી છે. વન વિભાગે વાહન અને લાકડું કબજે કરી કાયદેસરની કાર્યવાહી શરૂ કરી છે.