૩૮ વર્ષથી વધુની શિક્ષણસેવા બાદ મુખ્ય શિક્ષક જયંતિભાઈ બારીયાને ભાવભીની વિદાય
ઉંઘઈમાંડવા પ્રાથમિક શાળામાં યોજાયો વિદાય સન્માન સમારોહ
નર્મદા: તિલકવાડા તાલુકાની ઉંઘઈમાંડવા પ્રાથમિક શાળામાં લાંબા સમયથી શિક્ષણસેવા આપનાર મુખ્ય શિક્ષક શ્રી જયંતિભાઈ ચંદુભાઈ બારીયાની ૩૮ વર્ષથી વધુની સેવાયાત્રા પૂર્ણ થતાં શાળા પરિવાર અને ગ્રામજનો દ્વારા ભાવભર્યો વિદાય સન્માન સમારોહ યોજાયો હતો.
શ્રી જયંતિભાઈ બારીયાએ તા. ૨૧ જુલાઈ, ૧૯૮૮ના રોજ વિરપુર પ્રાથમિક શાળાથી શિક્ષક તરીકે કારકિર્દીની શરૂઆત કરી હતી. આશરે પાંચ વર્ષ બાદ તા. ૨ જૂન, ૧૯૯૩ના રોજ વરવાડા પ્રાથમિક શાળામાં બદલી થઈ હતી, જ્યાં છ વર્ષ સુધી સેવા આપી હતી. ત્યારબાદ તા. ૨ જૂન, ૧૯૯૯ના રોજ પોતાના વતનની ઉંઘઈમાંડવા પ્રાથમિક શાળામાં જોડાઈ શિક્ષક અને મુખ્ય શિક્ષક તરીકે બે દાયકાથી વધુ સમય સુધી નિષ્ઠાપૂર્વક સેવા આપી હતી.
વિશેષ બાબત એ છે કે જે શાળામાં તેમણે વિદ્યાર્થી તરીકે અભ્યાસ કર્યો હતો, એ જ શાળામાં શિક્ષક અને મુખ્ય શિક્ષક તરીકે સેવા કરવાનો તેમને અવસર મળ્યો હતો. શિક્ષણકાર્ય ઉપરાંત તેઓ સતત ૧૫ વર્ષ સુધી બી.એલ.ઓ. તરીકે પણ કામગીરી કરી ચૂક્યા છે. તેમની કામગીરીને બિરદાવતાં શૈક્ષણિક વર્ષ ૨૦૨૬-૨૭માં તેમને પ્રતિભાશાળી શિક્ષકનું પ્રમાણપત્ર પણ એનાયત કરવામાં આવ્યું હતું.
સરળ, શાંત અને સૌમ્ય સ્વભાવના જયંતિભાઈ બારીયાએ વિદ્યાર્થીઓ, વાલીઓ, સહકર્મીઓ અને ગ્રામજનો સાથે આત્મીય સંબંધો જાળવી રાખ્યા હતા. વિદાય સમારોહમાં શાળા પરિવાર, ગ્રામજનો, એસ.એમ.સી. સભ્યો તેમજ તાલુકા અને જિલ્લા કક્ષાના સંગઠનોના હોદ્દેદારો ઉપસ્થિત રહ્યા હતા. આ પ્રસંગે તેમનું સન્માનપત્ર આપી સન્માન કરવામાં આવ્યું હતું અને મહેમાનો તથા ગ્રામજનોએ તેમની શિક્ષણસેવાને બિરદાવી હતી. કાર્યક્રમ બાદ સમૂહ ભોજનનું પણ આયોજન કરવામાં આવ્યું હતું.
ઉપસ્થિત સૌએ શ્રી જયંતિભાઈ બારીયાના નિવૃત્તિ પછીના જીવન માટે સુખ, શાંતિ, સમૃદ્ધિ અને સારા સ્વાસ્થ્યની શુભકામનાઓ પાઠવી હતી. વિરપુરથી શરૂ થયેલી તેમની ૩૮ વર્ષથી વધુની સેવાયાત્રા વરવાડા થઈ ઉંઘઈમાંડવા સુધી પહોંચી અને અનેક વિદ્યાર્થીઓના જીવનઘડતરમાં અમૂલ્ય યોગદાન આપી યાદગાર બની હતી.
રિપોર્ટર ભાઈલાલભાઈ બારીયા નર્મદા
About the Author
