મોડાસા: હઝરત પીર મખદૂમ મહેમુદ લાહોરી દરગાહ-કબ્રસ્તાનની વક્ફ મિલકતમાં ટ્રસ્ટીઓના વ્યક્તિગત નામો દાખલ કરવા સામે ઉઠ્યો પ્રચંડ વિરોધ
ચેરિટી કમિશનર અને મહેસૂલ વિભાગના પરિપત્રો ટાંકી મામલતદાર સમક્ષ વાંધા અરજી દાખલ: રેવન્યુ રેકર્ડમાંથી વ્યક્તિગત નામો કમી કરી માત્ર ટ્રસ્ટ/વક્ફનું નામ જ રાખવા માંગણી!
મોડાસા (અરવલ્લી):
મોડાસા ખાતે આવેલ ઐતિહાસિક અને પવિત્ર હઝરત પીર મખદૂમ મહેમુદ લાહોરી સાહેબ દરગાહ અને કબ્રસ્તાન (ગુજરાત રાજ્ય વક્ફ બોર્ડ રજી. નં. B-93, સાબરકાંઠા)ની જમીનના રેવન્યુ રેકર્ડમાં વ્યક્તિગત વહીવટકર્તાઓના નામો દાખલ કરવાની હિલચાલ સામે ભારે વિવાદ ઊભો થયો છે. મોડાસાના સામાજિક કાર્યકર નઈમ ઈકબાલહુસેન ટાઢા દ્વારા મામલતદાર કચેરીના ઈ-ધરા કેન્દ્રમાં કાયદાકીય જોગવાઈઓ અને સરકારી પરિપત્રો ટાંકીને સખત વાંધા અરજી નોંધાવવામાં આવી છે!
મોજે મોડાસાના જૂના સર્વે નંબર ૩૯૮ (નવો બ્લોક નં. ૭૯૨) તથા જૂના સર્વે નંબર ૩૯૯ (નવો બ્લોક નં. ૭૩૦) વાળી જમીન હઝરત પીર મખદૂમ મહેમુદ લાહોરી સાહેબ દરગાહ અને કબ્રસ્તાનની વક્ફ મિલકત છે. આ મિલકતના ૭/૧૨ રેકર્ડમાં અગાઉ નોંધાયેલા ત્રણ નામો પૈકી બે વ્યક્તિઓ અવસાન પામ્યા હોવાનું જણાવી, વહીવટદાર કાઝી ફખરુદ્દીન હુસેનમીયાં દ્વારા વક્ફ બોર્ડના એક પ્રમાણપત્રના આધારે અન્ય ૭ વ્યક્તિઓના નામ ૭/૧૨ તથા રેવન્યુ રેકર્ડમાં દાખલ કરવા મામલતદાર સમક્ષ અરજી કરવામાં આવી હતી!
ચેરિટી કમિશનર અને મહેસૂલ પરિપત્રનો સીધો ભંગ: ચેરિટી કમિશનર, ગુજરાત રાજ્યના પત્ર (જાવક નં. ૧૧૧૯૮/૧૯, તા. ૧૨/૦૩/૨૦૧૯) તથા મહેસૂલ વિભાગના પરિપત્ર મુજબ, ટ્રસ્ટ કે વક્ફની સ્થાવર મિલકતોમાં ટ્રસ્ટીઓ કે પૂજારીઓના વ્યક્તિગત નામ હોવાને કારણે ભવિષ્યમાં વારસાઈ દાવા, ગેરકાયદે વેચાણ કે વિવાદો ઊભા થતા હોય છે. તેથી સરકારી સૂચના મુજબ આવા તમામ વ્યક્તિગત નામો કમી કરીને રેકર્ડ પર માત્ર ટ્રસ્ટ/વક્ફનું નામ અને નોંધણી નંબર જ દર્શાવવાના રહે છે. આ પરિપત્રની વિરુદ્ધ જઈને નવા ૭ વ્યક્તિગત નામો દાખલ કરવાની માંગણી ગેરકાયદેસર છે!
વક્ફ મિલકત પર વ્યક્તિગત વારસાઈ કે માલિકી ન હોઈ શકે: વક્ફ અધિનિયમ, ૧૯૯૫ મુજબ વક્ફ મિલકત ઈશ્વર/અલ્લાહને અર્પિત થયેલી હોય છે, જેમાં મુતવલ્લી કે વહીવટકર્તા માત્ર સંચાલક હોય છે, માલિક નહીં. સુપ્રીમ કોર્ટના ચુકાદાઓ ટાંકીને રજૂઆત કરાઈ છે કે મહેસૂલી નોંધ માલિકી હક્ક આપતી નથી, પરંતુ રેકર્ડ પર વ્યક્તિગત નામ ચઢવાથી તેનો દુરુપયોગ બેંક લોન, બાનાખત કે ગેરકાયદે બાંધકામ માટે થવાની સંભાવના રહે છે. વક્ફ બોર્ડના પ્રમાણપત્રનો અર્થ રેવન્યુ નોંધ નથી: વક્ફ બોર્ડ દ્વારા અપાયેલું પ્રમાણપત્ર માત્ર હાલના વહીવટકર્તાઓની યાદી દર્શાવતું ઉપલબ્ધ રેકર્ડ આધારિત સર્ટીફિકેટ છે, રેવન્યુ રેકર્ડમાં નામ દાખલ કરવાનો કોઈ આદેશ નથી. સરકારી કબ્રસ્તાન સર્વે નં. ૩૯૭ અંગે સ્પષ્ટતા: અરજદારે પોતે સ્વીકાર્યું છે કે સર્વે નંબર ૩૯૭ સરકારી કબ્રસ્તાન છે. તેથી તેમાં કોઈ પણ ખાનગી ટ્રસ્ટ કે વ્યક્તિનું નામ દાખલ કરવાનો પ્રશ્ન જ ઉપસ્થિત થતો નથી!
અરજદારની મુખ્ય માંગણીઓ
કાઝી ફખરુદ્દીન હુસેનમીયાં દ્વારા ૭ નવા નામો દાખલ કરવાની તા. ૨૩/૦૭/૨૦૨૬ની અરજી અન્વયે કોઈ કાર્યવાહી ન કરવી અને તેને તકરારી કેસ ગણી નામંજૂર કરવી. સર્વે નં. ૩૯૮ (૭૯૨) અને ૩૯૯ (૭૩૦)ના રેવન્યુ રેકર્ડમાંથી હયાત ટ્રસ્ટીઓ સહિતના તમામ વ્યક્તિગત નામો કાયમી ધોરણે રદ કરવા. સરકારી પરિપત્ર મુજબ રેવન્યુ રેકર્ડમાં માત્ર “હઝરત પીર મખદૂમ મહેમુદ લાહોરી સાહેબ દરગાહ અને કબ્રસ્તાન (વક્ફ), ગુજરાત રાજ્ય વક્ફ બોર્ડ નોંધણી નં. બી-૯૩, સાબરકાંઠા” એટલું જ નામ કાયમી રાખવું!
કબ્રસ્તાન જમીનનો મૂળ હેતુ રેકર્ડમાં જળવાઈ રહે અને ભવિષ્યમાં કોઈપણ ફેરફાર નોંધ પાડતાં પહેલાં સ્થાનિક સમાજ અને અરજદારને સુનાવણીની તક આપવી. આ મામલે જિલ્લા કલેક્ટર અરવલ્લી, પ્રાંત અધિકારી મોડાસા તેમજ ગુજરાત રાજ્ય વક્ફ બોર્ડના ચેરમેન સમક્ષ પણ લેખિત રજૂઆતો પહોંચાડવામાં આવતાં વહીવટી તંત્રમાં ભારે ચર્ચા જાગી છે!
About the Author
