ਕਿਹਾ: ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੀ ਸਰਬਉੱਚਤਾ ਕਾਇਮ ਰੱਖਣੀ ਜਰੂਰੀ
ਮਾਰਚ 2 (ਜਗਜੀਤ ਸਿੰਘ)ਅਕਾਲੀ ਦਲ ਅੰਮ੍ਰਿਤਸਰ ਦੇ ਮੁੱਖ ਬੁਲਾਰੇ, ਸਿਆਸੀ ਅਤੇ ਮੀਡੀਆ ਸਲਾਹਕਾਰ ਇਕਬਾਲ ਸਿੰਘ ਟਿਵਾਣਾ ਨੇ ਪ੍ਰੈਸ ਦੇ ਨਾਂ ਜਾਰੀ ਇਕ ਬਿਆਨ ਵਿਚ ਕਿਹਾ ਕਿ ਸ੍ਰੀ ਅਕਾਲ ਤਖਤ ਸਾਹਿਬ ਦੀ ਸੰਸਥਾਂ ਦੀ ਸਰਬਉੱਚਤਾ ਅਤੇ ਦੁਨੀਆ ਦਾ ਕੋਈ ਵੀ ਵੱਡੇ ਤੋ ਵੱਡਾ ਰੁਤਬਾ ਤੁੱਛ ਹੈ। ਇਸ ਦੇ ਮਾਣ-ਸਨਮਾਨ ਨੂੰ ਕਾਇਮ ਰੱਖਣ ਲਈ ਆਪਣੀਆ ਨਿੱਜੀ ਇਛਾਵਾ, ਅਹੁਦਿਆ ਅਤੇ ਵੱਡੇ ਤੋ ਵੱਡੇ ਸਾਧਨਾਂ ਨੂੰ ਨਿਛਾਵਰ ਕਰ ਦੇਣਾ ਗੁਰਸਿੱਖ ਦਾ ਪਰਮ-ਧਰਮ ਫਰਜ ਹੈ, ਜਿਸਦੀ ਇਤਿਹਾਸ ਪ੍ਰਤੱਖ ਗਵਾਹੀ ਭਰਦਾ ਹੈ। ਉਨ੍ਹਾਂ ਕਿਹਾ ਕਿ ਜੋ ਸਿਆਸਤਦਾਨ ਆਪਣੇ ਰਾਜਸੀ, ਧਾਰਮਿਕ ਅਹੁਦਿਆ ਨੂੰ ਕਾਇਮ ਰੱਖਣ ਹਿੱਤ ਸ੍ਰੀ ਅਕਾਲ ਤਖਤ ਸਾਹਿਬ ਵੱਲੋ ਹੋਏ ਹੁਕਮਾਂ ਨੂੰ ਟਿੱਚ ਸਮਝਦੇ ਉਹ ਕਤਈ ਵੀ ਖਾਲਸਾ ਪੰਥ ਵਿਚ ਆਪਣਾ ਮਾਣ ਸਨਮਾਨ ਨਹੀ ਪਾ ਸਕਦੇ। ਉਨ੍ਹਾਂ ਨੂੰ ਹਮੇਸ਼ਾਂ ਦੁਰਕਾਰ ਦਾ ਸਾਹਮਣਾ ਹੀ ਕਰਨਾ ਪੈਦਾ ਹੈ, ਇਸ ਲਈ ਸ. ਸੁਖਬੀਰ ਸਿੰਘ ਬਾਦਲ ਅਤੇ ਉਨ੍ਹਾਂ ਦੀ ਜੀ-ਹਜੂਰੀ ਵਾਲੇ ਦਿਸ਼ਾਹੀਣ ਸਿਆਸਤਦਾਨ ਕਿੰਨੀਆ ਵੀ ਗੈਰ ਦਲੀਲ ਗੱਲਾਂ ਅਤੇ ਅਮਲ ਕਰਕੇ ਆਪਣੇ ਆਪ ਨੂੰ ਸਿਆਸੀ ਤੇ ਸਮਾਜਿਕ ਤੌਰ ਤੇ ਜਿਊਂਦਾ ਰੱਖਣ ਦੀ ਕੋਸਿਸ ਕਿਉਂ ਨਾ ਕਰਨ ਉਨ੍ਹਾਂ ਦੀ ਆਤਮਿਕ ‘ਤੇ ਇਖਲਾਕੀ ਮੌਤ ਕੋਈ ਨਹੀ ਰੋਕ ਸਕਦਾ, ਇਸ ਲਈ ਸ੍ਰੀ ਅਕਾਲ ਤਖਤ ਸਾਹਿਬ ਦੀ ਸੰਸਥਾਂ ਨਾਲ ਮੱਥਾ ਲਗਾਉਣ ਦੀ ਥਾਂ ਉਥੋ ਹੋਏ ਹੁਕਮਾਂ ਦੀ ਅਵੱਗਿਆ ਕਰਨ ਦੀ ਥਾਂ ਉਸ ਨੂੰ ਸਮਰਪਿਤ ਹੋਣਾ ਬਿਹਤਰ ਹੋਵੇਗਾ, ਵਰਨਾ ਖਾਲਸਾ ਪੰਥ ਵਿਚ ਉਹ ਵਿਚਰਣ ਦੇ ਸਮਰੱਥ ਨਹੀ ਰਹਿ ਸਕਣਗੇ। ਉਨ੍ਹਾਂ ਕਿਹਾ ਕਿ ਜੇਕਰ ਇਹ ਲੋਕ ਆਪਣੀ ਸਿਆਸੀ, ਧਨ ਦੌਲਤਾਂ ਅਤੇ ਤਾਕਤ ਦੇ ਹਊਮੈ ਵਿਚ ਆ ਕੇ ਮੀਰੀ-ਪੀਰੀ ਦੀ ਸੰਸਥਾਂ ਦੇ ਮਾਣ ਸਨਮਾਨ ਨੂੰ ਠੇਸ ਪਹੁੰਚਾਉਣ, ਸਿੱਖੀ ਮਰਿਯਾਦਾਵਾ ਦੀ ਤੋਹੀਨ ਕਰਨ ਤੋ ਬਾਜ ਨਹੀ ਆਉਦੇ ਤਾਂ ਸ੍ਰੀ ਅਕਾਲ ਤਖਤ ਸਾਹਿਬ ਦੇ ਜਥੇਦਾਰ ਨੂੰ ਚਾਹੀਦਾ ਹੈ ਕਿ ਇਨ੍ਹਾਂ ਨੂੰ ਪੰਥ ਵਿਚੋ ਛੇਕ ਦਿਤਾ ਜਾਵੇ ਅਤੇ ਖਾਲਸਾ ਪੰਥ ਵਿਚ ਜੋ ਭੰਬਲਭੂਸੇ ਵਾਲੀ ਸਥਿਤੀ ਬਣੀ ਹੋਈ ਹੈ ਉਸ ਵਿਚੋ ਬਾਹਰ ਕੱਢਣ ਦੀ ਜਿੰਮੇਵਾਰੀ ਨਿਭਾਉਣ ਅਤੇ ਖਾਲਸਾ ਪੰਥ ਦੀ ਵੱਖ-ਵੱਖ ਧੜਿਆ, ਗਰੁੱਪਾਂ ਵਿਚ ਖੇਰੂ-ਖੇਰੂ ਹੋਈ ਸ਼ਕਤੀ ਨੂੰ ਸ੍ਰੀ ਅਕਾਲ ਤਖਤ ਸਾਹਿਬ ਦੀ ਅਗਵਾਈ ਹੇਠ ਇਕੱਤਰ ਕਰਨ ਵਿਚ ਭੂਮਿਕਾ ਨਿਭਾਉਣ।”ਉਨ੍ਹਾਂ ਆਸ ਪ੍ਰਗਟ ਕੀਤੀ ਕਿ ਜਥੇਦਾਰ ਸਾਹਿਬ ਜਿਨ੍ਹਾਂ ਕੋਲ ਸਮੁੱਚੇ ਖਾਲਸਾ ਪੰਥ ਵੱਲੋ ਵੱਡੀ ਇਖਲਾਕੀ, ਧਾਰਮਿਕ ਸ਼ਕਤੀ ਦੀ ਬਖਸਿਸ ਹੈ ਉਹ ਉਸਦੀ ਸਹੀ ਦਿਸ਼ਾ ਵੱਲ ਵਰਤੋ ਕਰਕੇ ਪੰਥਦੋਖੀਆਂ ਨੂੰ ਆਪਣੇ ਕੀਤੇ ਕੁਕਰਮਾ ਦੀ ਸਜ਼ਾ ਦੇਣ ਦੀ ਜਿੰਮੇਵਾਰੀ ਨਿਭਾਉਦੇ ਹੋਏ, ਤਖਤਾਂ ਦੇ ਜਥੇਦਾਰ ਸਾਹਿਬਾਨ ਦੀਆਂ ਨਿਯੁਕਤੀਆ ਤੇ ਸੇਵਾ ਮੁਕਤੀਆ ਲਈ ਇਕ ਨਵਾਂ ਨਿਰੋਆ ਸਮੇ ਦੇ ਹਾਣ ਦਾ ਵਿਧੀ ਵਿਧਾਨ ਸਿਰਜਦੇ ਹੋਏ ਕੌਮ ਦੀ ਖੇਰੂ ਖੇਰੂ ਹੋਈ ਸ਼ਕਤੀ ਨੂੰ ਸ੍ਰੀ ਅਕਾਲ ਤਖਤ ਸਾਹਿਬ ਦੀ ਅਗਵਾਈ ਵਿਚ ਇਕੱਤਰ ਕਰਕੇ ਅਗਲੇ ਕੌਮੀ ਮਿਸਨ ਦੀ ਪ੍ਰਾਪਤੀ ਵੱਲ ਲਗਾਉਣਗੇ, ਜਿਸ ਨਾਲ ਸਮੁੱਚੇ ਸੰਸਾਰ ਵਿਚ ਸਾਹਿਬ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਅਤੇ ਗੁਰੂ ਸਾਹਿਬਾਨ ਜੀ ਦੀ ਮਨੁੱਖਤਾ ਪੱਖੀ ਸਰਬੱਤ ਦੇ ਭਲੇ ਵਾਲੀ ਵੱਡਮੁੱਲੀ ਸੋਚ ਨੂੰ ਹਰ ਕੋਨੇ ਵਿਚ ਪਹੁੰਚਾਉਣ ਦੇ ਫਰਜ ਵੀ ਅਦਾ ਕਰਨਗੇ।
ਫ਼ੋਟੋ ਕੈਪਸਨ: ਭਾਈ ਇਕਬਾਲ ਸਿੰਘ ਟਿਵਾਣਾ
