*બરડામાં મકાઈ-ભીંડાની વચ્ચે ગાંજાનું વાવેતર ઝડપાયું, રૂ.15.48 લાખનો મુદ્દામાલ જપ્ત*
*30.97 કિલો ગાંજાના છોડ સાથે 40 વર્ષીય આરોપી ઝડપાયો; LCB અને વઘઈ પોલીસની સંયુક્ત કાર્યવાહી*
*આહવા, ડાંગ | રિપોર્ટર : ઝાકિર ઝંકાર*
ડાંગ જિલ્લામાં માદક પદાર્થોના ગેરકાયદેસર વાવેતર અને હેરાફેરી સામે પોલીસ દ્વારા હાથ ધરાયેલી કાર્યવાહી દરમિયાન વઘઈ તાલુકાના બરડા ગામમાંથી ગાંજાના વાવેતરનો મોટો જથ્થો ઝડપાયો છે. ડાંગ જિલ્લા લોકલ ક્રાઇમ બ્રાન્ચ (LCB) અને વઘઈ પોલીસની સંયુક્ત ટીમે કાર્યવાહી કરી ગાંજાના નાના-મોટા છોડ મળી કુલ 30.97 કિલો વજનનો મુદ્દામાલ, જેની કિંમત રૂ.15,48,500 હોવાનું પોલીસે જણાવ્યું છે.
સુરત વિભાગના પોલીસ મહાનિરીક્ષક પ્રેમવીર સિંહ (IPS) દ્વારા ચાલી રહેલા “નો ડ્રગ્સ ઇન સાઉથ ગુજરાત” અભિયાન અંતર્ગત ડાંગ જિલ્લામાં માદક પદાર્થોના ઉત્પાદન, વાવેતર, સેવન અને હેરાફેરી સામે કડક કાર્યવાહી કરવા સૂચના આપવામાં આવી હતી. પોલીસ અધિક્ષક પૂજા યાદવના માર્ગદર્શન હેઠળ વઘઈ પોલીસ અને LCB ટીમે સંયુક્ત કામગીરી હાથ ધરી હતી.
પોલીસને બાતમી મળી હતી કે વઘઈ તાલુકાના બરડા ગામના રહેવાસી હરીભાઈ રડકેભાઈ રાઠોડ (ઉંમર 40 વર્ષ) દ્વારા પોતાના રહેણાંક મકાનના પાછળના વાડામાં ગાંજાના છોડનું વાવેતર કરવામાં આવ્યું છે. બાતમીના આધારે પોલીસે સ્થળ પર દરોડો પાડ્યો હતો.
દરોડા દરમિયાન આરોપીએ અન્ય પાકોની વચ્ચે ગાંજાના છોડ વાવ્યા હોવાનું સામે આવ્યું હતું. પોલીસના જણાવ્યા મુજબ મકાઈ, ભીંડા, કાકડી અને ખરસાટાના છોડની વચ્ચે આશરે 3 ફૂટથી 13 ફૂટ ઊંચાઈના ગાંજાના 7 છોડ મળી આવ્યા હતા. પોલીસે તમામ મુદ્દામાલ કબજે કરી આરોપી હરીભાઈ રડકેભાઈ રાઠોડને ઝડપી પાડ્યો હતો.
આ મામલે વઘઈ પોલીસ સ્ટેશનમાં ગુ.ર.નં. 11219007260534/2026 નોંધવામાં આવ્યો છે. આરોપી વિરુદ્ધ NDPS એક્ટ-1985ની કલમ 8(બી), 8(સી), 20(એ)(1) અને 20(બી)(2)(સી) મુજબ ગુનો નોંધવામાં આવ્યો છે.
પોલીસના જણાવ્યા મુજબ આ કાર્યવાહી “નો ડ્રગ્સ ઇન સાઉથ ગુજરાત” અભિયાન અંતર્ગત ડાંગ જિલ્લામાં ગેરકાયદેસર ગાંજાના વાવેતર સામેની મહત્વની કામગીરી છે.
આ સમગ્ર કામગીરી વઘઈ પોલીસ સ્ટેશનના PI એ.એ. ચાવડા અને LCBના PSI જે.જી. અનડકટના માર્ગદર્શન હેઠળ વઘઈ પોલીસ તથા LCBની ટીમે સંયુક્ત રીતે હાથ ધરી હતી.
About the Author
