મોડાસા નગરપાલિકાની ‘વ્હાલા દવલા’ની નીતિ? શુકુન પાર્ક સોસાયટીમાં રાજકીય ઈશારે દબાણ હટાવવામાં પક્ષપાત થતો હોવાનો ગંભીર આક્ષેપ
અરવલ્લી જિલ્લાના મુખ્ય મથક મોડાસામાં નગરપાલિકાની કામગીરી ફરી એકવાર વિવાદના વમળમાં આવી છે. શહેરના ડુગરવાડા રોડ પર આવેલી શુકુન પાર્ક સોસાયટીમાં પાલિકા દ્વારા દબાણ હટાવવાની કામગીરીમાં ખુલ્લેઆમ પક્ષપાત અને રાજકીય દખલગીરી થતી હોવાના આક્ષેપો સ્થાનિક રહીશો દ્વારા કરવામાં આવ્યા છે. શું છે સમગ્ર મામલો શુકુન પાર્ક સોસાયટીમાં રહેતા જાવેદભાઈ લુહારે નગરપાલિકા સામે રોષ વ્યક્ત કરતા જણાવ્યું હતું કે, પાલિકા તંત્ર બેવડી નીતિ (વ્હાલા દવલાની નીતિ) અપનાવી રહ્યું છે. તેમના જણાવ્યા મુજબ, સોસાયટીના કેટલાક માથાભારે તત્વો દ્વારા અંગત અદાવત રાખીને તેમના ઘરની સેફ્ટી માટે બનાવેલી કમ્પાઉન્ડ વોલને ગેરકાયદેસર ગણાવી હતી. નવાઈની વાત એ છે કે, નગરપાલિકાએ આ બાબતે ત્વરિત એક્શન લઈ માત્ર ૨૪ કલાકની નોટિસ આપીને તેમનું દબાણ દૂર કરાવ્યું હતું. એક આંગળી ચીંધો તો ત્રણ તમારી તરફ હોય ભોગ બનનાર જાવેદભાઈએ આક્ષેપ કર્યો છે કે જ્યારે તેમના પર કાર્યવાહી કરવામાં આવી, ત્યારે તેમણે પણ સામે ફરિયાદ કરી હતી કે સોસાયટીના અન્ય રહીશો દ્વારા રસ્તા પર આશરે ૫ થી ૭ ફૂટ જેટલું દબાણ કરવામાં આવ્યું છે. આ અંગે નગરપાલિકામાં લેખિત રજૂઆતો પણ કરવામાં આવી છે અને સ્થળ પર ડિમાર્કેશન (માપણી) પણ થઈ ગયું છે. ૬ મહિનાથી તંત્ર મૌન કેમ સૌથી મોટો સવાલ એ છે કે, જાવેદભાઈનું દબાણ હટાવવામાં જે તત્પરતા દાખવવામાં આવી હતી, તે સોસાયટીના અન્ય દબાણો હટાવવામાં કેમ દેખાતી નથી છેલ્લા ૬ મહિનાથી ડિમાર્કેશન થઈ ગયું હોવા છતાં પાલિકાના અધિકારીઓ કોઈ અદ્રશ્ય રાજકીય દબાણ હેઠળ કેમ ચૂપ બેઠા છે? જાવેદભાઈએ કંટાળીને હવે મીડિયા સમક્ષ નગરપાલિકાની આ પોલ ખોલી છે.
શું મોડાસા નગરપાલિકા માત્ર સામાન્ય નાગરિકોને જ નિશાન બનાવે છે શું રાજકીય વગ ધરાવતા લોકોના દબાણો હટાવતા તંત્રના હાથ ધ્રૂજે છે? હાલ તો આ મામલે પાલિકાની વિશ્વસનીયતા સામે શંકાની સોય તકાઈ છે. હવે જોવું રહ્યું કે આ મામલો મીડિયામાં આવ્યા બાદ તંત્ર કુંભકર્ણની નિદ્રામાંથી જાગે છે કે કેમ.
About the Author
