હર ઘર તિરંગા’ અને ‘વિભાજન વિભીષિકા સ્મૃતિ દિવસ’ની ઉજવણી અંતર્ગત પંચમહાલ જિલ્લા કલેક્ટરશ્રીની અધ્યક્ષતામાં પત્રકાર પરિષદ યોજાઈ
નગરજનો દેશભક્તિના આ મહાપર્વમાં ઉત્સાહભેર સહભાગી બને: જિલ્લા કલેક્ટર શ્રી અજય દહિયા
પંચમહાલ, સોમવાર: સ્વતંત્રતા પર્વની ઉજવણીના ભાગરૂપે પંચમહાલ જિલ્લામાં ‘હર ઘર તિરંગા’ અભિયાન તથા ‘વિભાજન વિભીષિકા સ્મૃતિ દિવસ’ અંતર્ગત વિવિધ કાર્યક્રમોનું આયોજન કરવામાં આવ્યું છે. આ અંગે માહિતી આપવા તેમજ જિલ્લાના નાગરિકોને ઉજવણીમાં સક્રિયપણે જોડાવા માટે પંચમહાલ જિલ્લા કલેક્ટર શ્રી અજય દહિયાની અધ્યક્ષતામાં પત્રકાર પરિષદ યોજાઈ હતી.
પોલીસ હેડક્વાર્ટરથી રામસાગર તળાવ સુધી યોજાશે તિરંગા યાત્રા
પત્રકાર પરિષદ દરમિયાન જિલ્લા કલેક્ટરશ્રીએ જણાવ્યું હતું કે, દર વર્ષની જેમ આ વર્ષે પણ પંચમહાલ જિલ્લામાં જિલ્લા કક્ષા તેમજ તમામ તાલુકા કક્ષાએ ભવ્ય **‘તિરંગા યાત્રા’**નું આયોજન કરવામાં આવ્યું છે.
જિલ્લા કક્ષાની મુખ્ય તિરંગા યાત્રા પોલીસ હેડક્વાર્ટરથી શરૂ થઈ રામસાગર તળાવ સુધી યોજાશે. કલેક્ટરશ્રીએ પંચમહાલ જિલ્લાના તેમજ ખાસ કરીને ગોધરા શહેરના તમામ નાગરિકોને મોટી સંખ્યામાં ઉપસ્થિત રહી તિરંગા યાત્રામાં જોડાઈ દેશભક્તિના આ મહાપર્વને ઉત્સાહભેર ઉજવવા અપીલ કરી હતી.
ઘેર-ઘેર તિરંગો લહેરાવી રાષ્ટ્રભક્તિની ભાવનાને પ્રબળ બનાવો
‘હર ઘર તિરંગા’ અભિયાન અંગે જિલ્લા કલેક્ટર શ્રી અજય દહિયાએ જણાવ્યું હતું કે, સરકારશ્રી દ્વારા પર્યાપ્ત પ્રમાણમાં રાષ્ટ્રધ્વજ ઉપલબ્ધ કરાવવામાં આવ્યા છે. નાગરિકો પોતાના ઘરો પર રાષ્ટ્રધ્વજ ફરકાવી ‘હર ઘર તિરંગા’ અભિયાનને જનભાગીદારીનું સ્વરૂપ આપે અને રાષ્ટ્રભક્તિની ભાવનાને વધુ પ્રબળ બનાવે તેવી તેમણે અપીલ કરી હતી.
૧૪ ઓગસ્ટે ‘વિભાજન વિભીષિકા સ્મૃતિ દિવસ’ની ઉજવણી
‘વિભાજન વિભીષિકા સ્મૃતિ દિવસ’ અંગે કલેક્ટરશ્રીએ જણાવ્યું હતું કે, આ વર્ષે વિશેષરૂપે ૧૪ ઓગસ્ટના રોજ સાંજે ગોધરા ખાતે ‘વિભાજન વિભીષિકા સ્મૃતિ દિવસ’ની ઉજવણી કરવામાં આવશે. આ વિશેષ કાર્યક્રમમાં પ્રભારી મંત્રીશ્રી પણ ઉપસ્થિત રહેશે.
ભારતના વિભાજન સમયે લાખો લોકોએ સહન કરેલી પીડા, સંઘર્ષ અને તેમના અપ્રતિમ સાહસને યાદ કરવા માટે ભારત સરકારના માર્ગદર્શન હેઠળ નાટક સહિત વિવિધ માધ્યમો દ્વારા આ સ્મૃતિ દિવસની ઉજવણી કરવામાં આવશે.
નાગરિકો અને સામાજિક સંગઠનોને ઉત્સાહપૂર્વક જોડાવા આહ્વાન
જિલ્લા કલેક્ટર શ્રી અજય દહિયાએ પંચમહાલ જિલ્લાના સામાન્ય નાગરિકો, યુવાનો તેમજ તમામ સામાજિક સંગઠનોને રાષ્ટ્રીય પર્વ નિમિત્તે આયોજિત વિવિધ કાર્યક્રમોમાં ઉત્સાહપૂર્વક ભાગ લઈ આ ઉજવણીને યાદગાર અને સફળ બનાવવા હૃદયપૂર્વક આહ્વાન કર્યું હતું.
આ પત્રકાર પરિષદમાં નિવાસી અધિક કલેક્ટર શ્રી જે. જે. પટેલ, નાયબ પોલીસ અધિક્ષક શ્રી દેસાઈ, મદદનીશ કલેક્ટર શ્રી, યુવા વિકાસ અધિકારી શ્રી રાજેશ પારધી સહિત પ્રિન્ટ તથા ઇલેક્ટ્રોનિક મીડિયાના પત્રકાર મિત્રો ઉપસ્થિત રહ્યા હતા.
બ્યુરો ચીફ – સપના રાઠોડ
પંચમહાલ
About the Author
