*આહવામાં રખડતા પશુઓની જાહેર હરાજી સામે વિરોધ, પાંજરાપોળમાં મોકલવાની માંગ*
*આહવા, ડાંગ | રિપોર્ટર: ઝાકિર ઝંકાર*
ડાંગ જિલ્લાના મુખ્ય મથક આહવા નગર અને આસપાસના વિસ્તારમાં રખડતા પશુઓ તથા ગૌવંશના પ્રશ્નને લઈને સુરત અને નવસારી જિલ્લા પ્રાણી અત્યાચાર નિવારણ સમિતિ દ્વારા આહવા ખાતે પ્રેસ કોન્ફરન્સ યોજવામાં આવી હતી. જેમાં રખડતા પશુઓની જાહેર હરાજી ન કરવા અને તેમને પાંજરાપોળમાં મોકલવા અંગે રજૂઆત કરવામાં આવી હતી.
પ્રેસ કોન્ફરન્સમાં સુરત જિલ્લા પ્રાણી અત્યાચાર નિવારણ સમિતિના આશિનભાઈ ગાંધી, નવસારી જિલ્લા પ્રાણી અત્યાચાર નિવારણ સમિતિના મહેન્દ્રભાઈ શાહ તેમજ જીવદયા ક્ષેત્રના અગ્રણી કાર્યકર્તા જગદીશભાઈ સહિતના આગેવાનો ઉપસ્થિત રહ્યા હતા.
સમિતિના આગેવાનોના જણાવ્યા મુજબ, આહવા નગરના રસ્તાઓ પર રખડતા પશુઓના કારણે અવારનવાર સમસ્યાઓ સર્જાય છે. ગ્રામપંચાયત દ્વારા આવા પશુઓને પૂરવા માટે ઢોર ડબ્બાની વ્યવસ્થા કરવામાં આવે છે, પરંતુ પશુઓને ત્યાં રાખ્યા બાદ તેમના કાયમી નિરાકરણનો પ્રશ્ન ઊભો થાય છે.
આ દરમિયાન આહવા ગ્રામપંચાયત દ્વારા આગામી 22 તારીખે રખડતા પશુઓની જાહેર હરાજી રાખવામાં આવી હોવાનો મુદ્દો સામે આવ્યો છે. ગૌવંશ સહિતના પશુઓની જાહેર હરાજી કરવી યોગ્ય નથી તેમ જણાવી પ્રાણી અત્યાચાર નિવારણ સમિતિએ તેનો વિરોધ નોંધાવ્યો હતો.
સમિતિ દ્વારા જિલ્લા કલેક્ટરને રજૂઆત કરી હરાજી રદ કરી રખડતા પશુઓને પાંજરાપોળમાં મોકલવાની માંગ કરવામાં આવી છે. સમિતિના જણાવ્યા મુજબ, દક્ષિણ ગુજરાતની અનેક પાંજરાપોળો આવા પશુઓને સ્વીકારવા માટે તૈયાર છે.
સમિતિએ જણાવ્યું હતું કે, જે પશુપાલકો પોતાના પશુઓ ઓળખી તેમને પરત લઈ જવા માંગતા હોય તેમને તે માટે તક આપવામાં આવે અને બાકીના પશુઓને વિવિધ પાંજરાપોળમાં મોકલી તેમના રક્ષણ અને સંભાળની વ્યવસ્થા કરવામાં આવે.
રખડતા પશુઓની સમસ્યાના માનવતાભર્યા અને કાયમી ઉકેલ માટે જાહેર હરાજીના બદલે પાંજરાપોળનો વિકલ્પ અપનાવવામાં આવે તેવી પ્રાણીપ્રેમી સંસ્થાઓ દ્વારા માંગ ઉઠાવવામાં આવી છે.
About the Author
