ਜਲੰਧਰ, 2 ਨਵੰਬਰ (ਪਰਮਿੰਦਰ ਸਿੰਘ ): ਮੈਡੀਕਲ ਸਾਇੰਸ ਦੇ ਖੇਤਰ ਵਿੱਚ ਤੇਜ਼ੀ ਨਾਲ ਹੋ ਰਹੀਆਂ ਆਧੁਨਿਕ ਤਬਦੀਲੀਆਂ ਅਤੇ ਨਵੀਆਂ ਇਲਾਜ ਤਕਨੀਕਾਂ ਤੋਂ ਡਾਕਟਰਾਂ ਨੂੰ ਜਾਣੂ ਕਰਵਾਉਣ ਦੇ ਉਦੇਸ਼ ਨਾਲ ਆਈਮਾ ਦੀ ਜਲੰਧਰ ਬ੍ਰਾਂਚ ਵੱਲੋਂ ਪ੍ਰਧਾਨ ਡਾ. ਜਗਜੀਤ ਸਿੰਘ ਭੋਲੋਵਾਸੀਆ ਦੀ ਅਗਵਾਈ ਹੇਠ “ਐਡਵਾਂਸਮੈਂਟ ਇਨ ਆਰਥੋਪੀਡਿਕ ਸਰਜਰੀ” ਵਿਸ਼ੇ ’ਤੇ ਸੀਐੱਮਈ (ਕੰਟੀਨਿਊਇੰਗ ਮੈਡੀਕਲ ਐਜੂਕੇਸ਼ਨ) ਸੈਮੀਨਾਰ ਕਰਵਾਇਆ ਗਿਆ। ਇਸ ਮੌਕੇ ਮੁੱਖ ਬੁਲਾਰੇ ਵਜੋਂ ਪ੍ਰਸਿੱਧ ਆਰਥੋਪੀਡਿਕ ਸਰਜਨ ਡਾ. ਸੰਜੀਵ ਗੋਇਲ ਨੇ ਵਿਸ਼ੇਸ਼ ਤੌਰ ’ਤੇ ਸ਼ਿਰਕਤ ਕੀਤੀ। ਪ੍ਰੋਗਰਾਮ ਦੀ ਸ਼ੁਰੂਆਤ ਭਗਵਾਨ ਧਨਵੰਤਰੀ ਦੀ ਪੂਜਾ ਨਾਲ ਹੋਈ। ਡਾ. ਸੰਜੀਵ ਗੋਇਲ ਨੇ ਆਰਥੋਪੀਡਿਕ ਸਰਜਰੀ ਦੇ ਖੇਤਰ ਵਿੱਚ ਵਿਕਸਿਤ ਹੋ ਰਹੀਆਂ ਆਧੁਨਿਕ ਤਕਨੀਕਾਂ, ਨਵੀਆਂ ਇਲਾਜ ਵਿਧੀਆਂ ਅਤੇ ਮਰੀਜ਼ਾਂ ਨੂੰ ਬਿਹਤਰ ਸਿਹਤ ਸਹੂਲਤਾਂ ਮੁਹੱਈਆ ਕਰਵਾਉਣ ਨਾਲ ਸਬੰਧਤ ਵੱਖ-ਵੱਖ ਪਹਿਲੂਆਂ ਬਾਰੇ ਵਿਸਥਾਰਪੂਰਵਕ ਜਾਣਕਾਰੀ ਸਾਂਝੀ ਕੀਤੀ। ਸੀਐੱਮਈ ਦੌਰਾਨ ਆਰਥੋਪੀਡਿਕ ਇਲਾਜ ਨਾਲ ਸਬੰਧਤ ਕਈ ਮਹੱਤਵਪੂਰਨ ਵਿਸ਼ਿਆਂ ’ਤੇ ਡੂੰਘਾਈ ਨਾਲ ਚਰਚਾ ਕੀਤੀ ਗਈ। ਇਨ੍ਹਾਂ ਵਿੱਚ ਆਰਥਰੋਸਕੋਪੀ, ਖੇਡਾਂ ਦੌਰਾਨ ਲੱਗਣ ਵਾਲੀਆਂ ਸੱਟਾਂ, ਟਰੌਮਾ ਕੇਅਰ ਅਤੇ ਮੈਨੇਜਮੈਂਟ ਤੋਂ ਇਲਾਵਾ ਕੂਹਣੀ ਦੀ ਬਜਾਏ ਚੂਲ੍ਹੇ ਅਤੇ ਗੋਡੇ ਦੇ ਜੋੜ ਬਦਲਣ (ਹਿੱਪ ਅਤੇ ਨੀ ਜੁਆਇੰਟ ਰਿਪਲੇਸਮੈਂਟ) ਵਰਗੇ ਵਿਸ਼ੇ ਪ੍ਰਮੁੱਖ ਰਹੇ। ਡਾ. ਗੋਇਲ ਨੇ ਦੱਸਿਆ ਕਿ ਆਰਥਰੋਸਕੋਪੀ ਅਤੇ ਘੱਟ ਚੀਰਾ ਲਗਾਉਣ ਵਾਲੀਆਂ ਆਧੁਨਿਕ ਤਕਨੀਕਾਂ ਰਾਹੀਂ ਹੁਣ ਕਈ ਗੰਭੀਰ ਸੱਟਾਂ ਅਤੇ ਜੋੜਾਂ ਦੀਆਂ ਸਮੱਸਿਆਵਾਂ ਦਾ ਪ੍ਰਭਾਵਸ਼ਾਲੀ ਇਲਾਜ ਸੰਭਵ ਹੋ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਐਡਵਾਂਸਡ ਟਰੌਮਾ ਕੇਅਰ ਤਹਿਤ ਗੰਭੀਰ ਹਾਦਸਿਆਂ ਵਿੱਚ ਜ਼ਖ਼ਮੀ ਹੋਏ ਮਰੀਜ਼ਾਂ ਨੂੰ ਸਮੇਂ ਸਿਰ ਢੁਕਵਾਂ ਮੈਡੀਕਲ ਅਤੇ ਸਰਜੀਕਲ ਇਲਾਜ ਮੁਹੱਈਆ ਕਰਵਾਉਣਾ ਬੇਹੱਦ ਮਹੱਤਵਪੂਰਨ ਹੈ। ਉਨ੍ਹਾਂ ਨੇ ਚੂਲ੍ਹੇ ਅਤੇ ਗੋਡੇ ਦੇ ਜੋੜ ਬਦਲਣ ਦੀਆਂ ਆਧੁਨਿਕ ਤਕਨੀਕਾਂ ਬਾਰੇ ਜਾਣਕਾਰੀ ਦਿੰਦਿਆਂ ਕਿਹਾ ਕਿ ਇਨ੍ਹਾਂ ਇਲਾਜ ਵਿਧੀਆਂ ਨਾਲ ਮਰੀਜ਼ਾਂ ਦੀ ਚੱਲਣ-ਫਿਰਨ ਦੀ ਸਮਰੱਥਾ ਵਧਾਉਣ ਦੇ ਨਾਲ-ਨਾਲ ਉਨ੍ਹਾਂ ਦੇ ਜੀਵਨ ਦੀ ਗੁਣਵੱਤਾ ਵਿੱਚ ਵੀ ਮਹੱਤਵਪੂਰਨ ਸੁਧਾਰ ਕੀਤਾ ਜਾ ਸਕਦਾ ਹੈ। ਮੰਚ ਦਾ ਸੰਚਾਲਨ ਡਾ. ਅਨੁ ਰਾਮਪਾਲ ਨੇ ਕੀਤਾ। ਇਸ ਮੌਕੇ ਡਾ. ਰਾਕੇਸ਼ ਸ਼ਰਮਾ, ਡਾ. ਨਰੇਸ਼ ਸ਼ਰਮਾ, ਡਾ. ਹਰੀਸ਼ ਸਹਿਗਲ, ਡਾ. ਜੋਗਿੰਦਰ ਅਰੋੜਾ, ਡਾ. ਅਨੁਪਮਾ ਸੂਦ, ਡਾ. ਵਿਨੈ ਖੰਨਾ, ਡਾ. ਅਨੀਤਾ ਅਰੋੜਾ, ਡਾ. ਰਾਜੇਸ਼ ਚਾਂਦਨਾ, ਡਾ. ਵਨੀਤਾ ਚਾਂਦਨਾ, ਡਾ. ਮਨੋਜ, ਡਾ. ਨਵਰਾਜ, ਡਾ. ਭਾਰਤ ਬਾਵਾ, ਡਾ. ਐੱਚ.ਐੱਸ. ਕਾਲੜਾ ਸਮੇਤ ਆਈਮਾ ਦੇ ਹੋਰ ਮੈਂਬਰਾਂ ਤੋਂ ਇਲਾਵਾ ਡਾ. ਅਭਿਸ਼ੇਕ, ਡਾ. ਜਸਕੀਰਤ, ਡਾ. ਰੇਖਾ, ਸੰਤੋਸ਼, ਗੁਰਪ੍ਰੀਤ, ਟਵਿੰਕਲ, ਮੀਨੂ, ਹਰਪ੍ਰੀਤ, ਨਰੇਸ਼ ਮਹਾਜਨ, ਰਿਸ਼ਭ ਮਹਾਜਨ, ਮਿੰਟੂ ਕਪੂਰ ਆਦਿ ਹਾਜ਼ਰ ਸਨ।
About the Author
