ਜਥੇਦਾਰ ਸਾਹਿਬਾਨ ਦੀਆਂ ਨਿਯੁਕਤੀਆ ਤੇ ਸੇਵਾਮੁਕਤੀਆ ਦੀ ਸਰਬਸਾਂਝੀ ਨਿਯਮਾਵਾਲੀ ਤੁਰੰਤ ਹੋਦ ਵਿਚ ਆਵੇ : ਟਿਵਾਣਾ
ਫ਼ਤਹਿਗੜ੍ਹ ਸਾਹਿਬ,(ਅਜੇ ਕੁਮਾਰ)
ਅਕਾਲੀ ਦਲ ਅੰਮ੍ਰਿਤਸਰ ਦੇ ਮੁਖ ਬੁਲਾਰੇ, ਸਿਆਸੀ ਅਤੇ ਮੀਡੀਆ ਸਲਾਹਕਾਰ ਇਕਬਾਲ ਸਿੰਘ ਟਿਵਾਣਾ ਨੇ ਪ੍ਰੈਸ ਦੇ ਨਾਂ ਜਾਰੀ ਇਕ ਬਿਆਨ ਵਿਚ ਕਿਹਾ ਕਿ ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੀ ਸੰਸਥਾਂ ਖਾਲਸਾ ਪੰਥ ਦੀ ਸਿਰਮੌਰ ਅਤੇ ਹਰ ਸੰਕਟ ਦੀ ਘੜੀ ਵਿਚ ਕੌਮ ਨੂੰ ਸਹੀ ਦਿਸ਼ਾ ਵੱਲ ਕੱਢਣ ਲਈ ਉਹ ਸੰਸਥਾਂ ਹੈ ਜਿਸ ਉਤੇ ਹੋਣ ਵਾਲੇ ਕਿਸੇ ਵੀ ਫੈਸਲੇ ਜਾਂ ਹੁਕਮਨਾਮਿਆ ਦੀ ਕੋਈ ਵੀ ਸਿੱਖ ਅਵੱਗਿਆ ਨਹੀ ਕਰ ਸਕਦਾ ਜੇਕਰ ਕੋਈ ਅਜਿਹੀ ਬਜਰ ਗੁਸਤਾਖੀ ਕਰਦਾ ਹੈ ਤਾਂ ਉਹ ਖਾਲਸਾ ਪੰਥ ਵਿਚ ਵਿਚਰਣ ਅਤੇ ਸਤਿਕਾਰ ਪ੍ਰਾਪਤ ਕਰਨ ਦੇ ਯੋਗ ਨਹੀ ਰਹਿੰਦਾ ਅਤੇ ਇਖਲਾਕੀ ਅਤੇ ਸਮਾਜਿਕ ਤੌਰ ‘ਤੇ ਆਪਣੀ ਮੌਤੇ ਆਪ ਮਰ ਜਾਂਦਾ ਹੈ। ਉਨ੍ਹਾਂ ਕਿਹਾ ਕਿ 2 ਦਸੰਬਰ 2024 ਨੂੰ ਸ੍ਰੀ ਅਕਾਲ ਤਖਤ ਸਾਹਿਬ ਤੋ ਹੋਏ ਹੁਕਮਨਾਮਿਆ ਉਪਰੰਤ ਸ੍ਰੀ ਸੁਖਬੀਰ ਸਿੰਘ ਬਾਦਲ ਅਤੇ ਉਸਦੇ ਦਿਸ਼ਾਹੀਣ ਗੈਰ ਸਿਧਾਤਿਕ ਜੀ ਹਜੂਰੀਆ ਦੀ ਬਦੌਲਤ ਸਾਡੀ ਮਹਾਨ ਸੰਸਥਾਂ ਸ੍ਰੀ ਅਕਾਲ ਤਖਤ ਸਾਹਿਬ ਦੇ ਮੀਰੀ ਪੀਰੀ ਦੇ ਸਿਧਾਂਤ ਦੇ ਸੰਸਾਰ ਪੱਧਰ ਦੇ ਮਾਣ ਸਨਮਾਨ ਤੇ ਸਿੱਖੀ ਪ੍ਰੰਰਪਰਾਵਾਂ ਦਾ ਘਾਣ ਹੋਇਆ ਹੈ ਉਸ ਲਈ ਇਹ ਜੁਮੇਵਾਰ ਹਨ। ਸਿੱਖ ਕੌਮ ਇਸ ਪੈਦਾ ਹੋਈ ਪੰਥਕ ਸਥਿਤੀ ਦੀ ਗੁੰਝਲ ਲਈ ਬਾਦਲ ਪਰਿਵਾਰ ਅਤੇ ਉਨ੍ਹਾਂ ਤੋ ਬਾਗੀ ਹੋਏ ਸਵਾਰਥੀ ਸਿਆਸਤਦਾਨਾਂ ਨੂੰ ਸਿੱਧੇ ਤੌਰ ਤੇ ਜਿੰਮੇਵਾਰ ਸਮਝਦੀ ਹੋਈ ਹੁਣ ਇਨ੍ਹਾਂ ਨੂੰ ਮੁਆਫ ਕਰਨ ਦੇ ਹੱਕ ਵਿਚ ਨਹੀ ਹੈ ਜਦੋਕਿ ਬਾਦਲ ਦਲੀਏ, ਬਾਗੀ ਅਤੇ ਦਾਗੀ ਦੋਵੇ ਧੜੇ ਜੋ ਇਖਲਾਕੀ ਅਤੇ ਸਮਾਜਿਕ ਤੌਰ ਤੇ ਖਾਲਸਾ ਪੰਥ ਵਿਚੋ ਮਨਫੀ ਹੋ ਚੁੱਕੇ ਹਨ ਇਹ ਦੋਵੇ ਧੜਿਆ ਦੇ ਆਗੂ ਆਪਣੇ ਆਪ ਨੂੰ ਸਿੱਖ ਕੌਮ ਵਿਚ ਸਿਆਸੀ ਤੌਰ ਤੇ ਜੀਵਤ ਰੱਖਣ ਲਈ ਸ੍ਰੀ ਅਕਾਲ ਤਖਤ ਸਾਹਿਬ ਵਰਗੀ ਮਹਾਨ ਸੰਸਥਾਂ ਅਤੇ ਉਸਦੇ ਜਥੇਦਾਰ ਸਾਹਿਬਾਨ ਦੀ ਦੁਰਵਰਤੋ ਕਰਦੇ ਆ ਰਹੇ ਹਨ ਜਦੋ ਕਿ ਦੋਵੇ ਧੜੇ ਇਸ ਲਈ ਜੁਮੇਵਾਰ ਹਨ। ਉਨ੍ਹਾਂ ਕਿਹਾ ਕਿ ਖਾਲਸਾ ਪੰਥ ਦੀਆਂ ਸਖਸ਼ੀਅਤਾਂ ਨੂੰ ਚਾਹੀਦਾ ਹੈ ਕਿ ਉਹ ਸਿਧਾਤਿਕ ਸੋਚ ਉਤੇ ਦ੍ਰਿੜ ਹੋ ਕੇ ਅਮਲ ਕਰਦੇ ਹੋਏ ਇਸ ਸੰਕਟ ਦੀ ਘੜੀ ਵਿਚੋ ਸ੍ਰੀ ਅਕਾਲ ਤਖਤ ਸਾਹਿਬ ਦੀ ਮਹਾਨ ਸੰਸਥਾਂ ਦੇ ਸਤਿਕਾਰ ਮਾਣ ਨੂੰ ਕਾਇਮ ਰੱਖਦੇ ਹੋਏ ਸਮੂਹਿਕ ਤੌਰ ਤੇ ਅਜਿਹਾ ਉਦਮ ਕਰਨ, ਜਿਸ ਨਾਲ ਕੋਈ ਵੀ ਸਵਾਰਥੀ ਸਿਆਸਤਦਾਨ ਸਾਡੀਆ ਸੰਸਥਾਵਾਂ ਅਤੇ ਉਨ੍ਹਾਂ ਦੀ ਅਸੀਮਤ ਸ਼ਕਤੀ ਦੀ ਆਉਣ ਵਾਲੇ ਸਮੇ ਵਿਚ ਦੁਰਵਰਤੋ ਨਾ ਕਰ ਸਕੇ ਅਤੇ ਸ੍ਰੀ ਅਕਾਲ ਤਖਤ ਸਾਹਿਬ ਦੀ ਸੰਸਥਾਂ ਦੇ ਉੱਚ ਰੁਤਬੇ ਤੇ ਮਾਣ ਮਰਿਯਾਦਾ ਨੂੰ ਪ੍ਰਸਨ ਚਿੰਨ੍ਹ ਲਗਾਉਣ ਦੀ ਗੁਸਤਾਖੀ ਕਰ ਸਕੇ।
ਫੋਟੋ ਕੈਪਸ਼ਨ: ਇਕਬਾਲ ਸਿੰਘ ਟਿਵਾਣਾ
About the Author
