ડાંગ જિલ્લાની મહિલા અને બાળ અધિકારીશ્રીની કચેરી, આહવા દ્વારા PHC કેન્દ્ર, સાપુતારા ખાતે PC-PNDT એક્ટ પર મેગા જાગૃતિ સેમિનાર યોજાયો
ઝાકિર ઝંકાર : આહવા : તા:૧૮ :
ડાંગ જિલ્લા મહિલા અને બાળ અધિકારીશ્રીની કચેરી, આહવા દ્વારા કન્યા ભ્રૂણ હત્યા નિવારણ અને સ્ત્રી-પુરુષ જન્મદરના સપ્રમાણ જાળવણીના રાષ્ટ્રીય લક્ષ્યને ધ્યાનમાં રાખીને એક અત્યંત મહત્વપૂર્ણ અને સવિસ્તાર જાગૃતિ સેમિનારનું આયોજન કરવામાં આવ્યું હતું.
ડાંગ જિલ્લાના સાપુતારા પ્રાથમિક આરોગ્ય કેન્દ્ર ખાતે તારીખ ૧૭/૧૧/૨૦૨૫ના રોજ યોજાયેલો આ એક દિવસીય સેમિનાર, “બેટી બચાવો બેટી પઢાઓ” યોજનાના માર્ગદર્શક સિદ્ધાંતોને સમર્પિત હતો, જેમાં PC-PNDT (Pre-Conception and Pre-Natal Diagnostic Techniques) એક્ટ, ૧૯૯૪ પર વિશેષ ભાર મૂકવામાં આવ્યો હતો.
પ્રાથમિક આરોગ્ય કેન્દ્રના ડૉ.શિવાંગભાઈ ચૌધરીએ PC-PNDT એક્ટ,૧૯૯૪ આ કાયદા વિશે ભારપૂર્વક જણાવ્યું હતું કે, ગર્ભના લિંગ નિદાનની તપાસ કરવી એ કાયદાકીય ગુનો છે અને આ કૃત્ય કરનાર તેમજ કરાવનાર બંને સજાને પાત્ર છે. તેમણે તબીબી વ્યવસાય સાથે જોડાયેલા લોકોની જવાબદારી પર પ્રકાશ પાડતા જણાવ્યું હતું કે, તેઓ કાયદાનું ચુસ્તપણે પાલન કરે અને કન્યા ભ્રૂણ હત્યાના દૂષણને સમાજમાંથી દૂર કરવામાં સહભાગી બને. સાથે જ સેમિનારનો ઉદ્દેશ આશા વર્કર બહેનોને એક્ટ વિશે સચોટ માહિતી આપવાનો હતો જેમાં તેઓ સમાજમાં ખોટી માન્યતાઓ અને ગેરકાયદેસર પ્રવૃત્તિઓ અંગે લોકોને અસરકારક રીતે જાગૃત કરી શકે.
મહિલા અને બાળ અધિકારી શ્રી ડૉ. મનીષાબેન મુલતાનીએ જણાવ્યુ કે, ભારતમાં ઘટી રહેલા બાળ લિંગ ગુણોત્તર (Child Sex Ratio – CSR) ને અટકાવવા અને ભ્રૂણ હત્યા (Female Foeticide) ને રોકવા માટે આ કાયદો બનાવવામાં આવ્યો છે. ગર્ભધારણ પહેલાં કે પછી, કોઈપણ વ્યક્તિ દ્વારા ભ્રૂણનું લિંગ નક્કી કરવાની પ્રવૃત્તિ પર સંપૂર્ણ પ્રતિબંધ મૂકવો. પ્રસુતિ પૂર્વે નિદાન તકનીકો (જેમ કે અલ્ટ્રાસાઉન્ડ, એમ્નિઓસેન્ટેસિસ, વગેરે) નો ઉપયોગ માત્ર જિનેટિક અસામાન્યતાઓ (genetic abnormalities), ચયાપચયની ખામીઓ (metabolic disorders), અથવા અન્ય ચોક્કસ રોગોને શોધવા પૂરતો જ મર્યાદિત કરવો. તેનો દુરુપયોગ લિંગ પસંદગી માટે થતો અટકાવવો.અને સાથે જ આશા વ્યક્ત કરી હતી. કે આ સઘન જાગૃતિ સેમિનાર ડાંગ જિલ્લામાં સ્ત્રી સશક્તિકરણ અને લિંગ સમાનતાના ધ્યેયને મૂર્તિમંત કરવામાં નિર્ણાયક ભૂમિકા ભજવશે.
કાર્યક્રમમાં ઉપસ્થિત અન્ય વિભાગના કર્મચારીશ્રીઓ દ્વારા પણ સેમિનાર લક્ષી ઉપયોગી માર્ગદર્શન પુરુ પાડ્યું હતું.
–
About the Author
