*માત્ર દસ માસના બાળકને હાઈડ્રોસેફેલસ જેવી ગંભીર બીમારીમાંથી બહાર કાઢતી સમયસરની સારવાર :*
*RBSK ની ટીમ દ્વારા ગંભીર રોગની સમયસર ઓળખ અને ત્વરિત યોગ્ય સારવારે બાળકને આપ્યુ નવજીવન:*
*અહેવાલ* : મનોજ ખેંગાર
ઝાકિર ઝંકાર : આહવા: તા: ૧૨
હાઈડ્રોસેફેલસ જેવી ગંભીર બીમારીથી ગ્રસ્ત, માત્ર દસ માસના બાળકની બીમારીને સમયસર ઓળખી અને ત્વરિત યોગ્ય સારવાર અપાવી ડાંગ જિલ્લાની RBSK ની ટીમે ગંભીર રોગથી ગ્રસ્ત બાળકને નવજીવન અપાવ્યું છે.
ડાંગ જિલ્લાના છેક છેવાડે આવેલા સુબીર તાલુકાના જામન્યામાળ ગામના દસ માસની વયના બાળક સુરજ સંજયભાઈ સાપતેના શિંગાણા પ્રાથમિક આરોગ્ય કેન્દ્ર ખાતે થયેલા નિદાનમાં, તેને ઓબ્સ્ટ્રક્ટિવ હાઈડ્રોસેફેલસ/કોમ્યુનિકેટિંગ હાઈડ્રોસેફેલસ હોવાનું જણાયુ. આ એક મગજની એવી સ્થિતિ છે, જેમાં મગજની અંદર રહેલું પ્રવાહી (CSF–સેરિબ્રોસ્પાઇનલ ફ્લુઇડ) યોગ્ય રીતે બહાર ન નીકળી શકવાને કારણે, અથવા વધુ પ્રમાણમાં બને ત્યારે મગજની કોઠરીઓમાં સંગ્રહિત થાય છે. જેના કારણે મગજ પર દબાણ વધે છે. જે બાળકોમાં માથુ મોટુ થવુ, ઉલટી, ચીડિયાપણુ, દૂધ ન પીવુ, ઝટકા આવવા, તથા વિકાસમાં વિલંબ જેવા લક્ષણો ઊભા કરી શકે છે.
ઓબ્સ્ટ્રક્ટિવ હાઈડ્રોસેફેલસમા આ પ્રવાહી નિકાસનો માર્ગ અવરોધિત થતો હોય છે. જ્યારે કોમ્યુનિકેટિંગ હાઈડ્રોસેફેલસમા પ્રવાહી શોષાઈ ન શકવાને કારણે પણ આવી સમસ્યા સર્જાય છે.
ડાંગના બાળકને આ તકલીફમાંથી બહાર કાઢવા માટે તેને ગત તા.૧૩ ડિસેમ્બરે ધરમપુર સ્થિત શ્રીમદ્ રાજચંદ્ર હોસ્પિટલ ખાતે દાખલ કરાયુ. જ્યાં નિષ્ણાંત તબીબો દ્વારા તા.૧૫ ડિસેમ્બરે તેની શસ્ત્રક્રિયા હાથ ધરવામાં આવી. અહીં વેંટ્રિક્યુલો પેરીટોનિયલ શંટ પ્રક્રિયા અપનાવી, મગજની કોઠરીમાંથી વધારાનું પ્રવાહી એક નળી (શંટ) દ્વારા પેટમાં મોકલવામાં આવ્યુ. જ્યાં તે સહજ રીતે શોષાઈ શકે છે. આથી મગજ પરનુ દબાણ ઘટતા બાળકના મગજના વિકાસને સુરક્ષા પ્રદાન કરી શકાય છે.
સમયસર નિદાન, રેફરલ અને નિષ્ણાત તબીબી ટીમના સમર્પિત પ્રયત્નોથી આ ઓપરેશન સંપૂર્ણ રીતે સફળ રહેતા, હાલે આ બાળકની સ્થિતિ સ્થિર અને ખૂબ સારી છે. માથાનુ દબાણ ઘટ્યું છે, અને બાળકમાં સુધારાના સકારાત્મક લક્ષણો જોવા મળી રહ્યા છે.
RBSK ટીમના ડો.વિષ્ણુ પ્રજાપતિ, ડો.ઋજુતા પટેલ, ફાર્માસિસ્ટ શ્રી મહેન્દ્રભાઈ, અને એફ.એચ.ડબલ્યુ દક્ષાબેનની સતત દેખરેખ હેઠળ નિયમિત ફોલોઅપ રહેલુ આ બાળક સંપૂર્ણ સ્વસ્થ છે.
હાઈડ્રોસેફેલસ જેવી ગંભીર બીમારીની પણ જો સમયસર ઓળખ થાય, તો આવા દર્દીઓને યોગ્ય સારવારથી સંપૂર્ણ રીતે સંભાળી શકાય છે. જે ડાંગની RBSK યોજના અને તેની અમલવારી કરતી ટીમ, પ્રાથમિક આરોગ્ય કેન્દ્ર, અને ઉચ્ચ તબીબી સંસ્થાઓ વચ્ચેના ઉત્કૃષ્ટ અને સુચારૂ સંકલને સાબિત કરતા, અનેક બાળકોના જીવનમાં આશાનો સંચાર થવા પામ્યો છે.
–
About the Author
