ચુંદડી પીકઅપ સ્ટેન્ડ નજીકથી રૂ.1.23 કરોડનો વિદેશી દારૂ ઝડપાયો, LCBની મોટી કાર્યવાહી
પંચમહાલ-ગોધરા: ઇન્દોર-અમદાવાદ નેશનલ હાઇવે નં. 47 પર ચુંદડી પીકઅપ સ્ટેન્ડ નજીક પાર્ક કરેલી તાડપત્રીવાળી ટાટા ટ્રક નં. RJ-14-GE-9981માંથી લોકલ ક્રાઇમ બ્રાન્ચ, પંચમહાલ-ગોધરાએ વિદેશી દારૂનો મોટો જથ્થો ઝડપી પાડ્યો છે.
પોલીસ તપાસ દરમિયાન ટ્રકમાંથી કુલ 1,035 પેટીઓમાં 36,912 નંગ વિદેશી દારૂની બોટલો, ક્વાર્ટરીયા અને બીયર ટીન મળી આવ્યા હતા. મુદ્દામાલની કુલ કિંમત રૂ.1,23,79,741 હોવાનું પોલીસે જણાવ્યું છે.
પંચમહાલ-ગોધરા રેન્જના નાયબ પોલીસ મહાનિરીક્ષક વિધી ચૌધરી અને પોલીસ અધિક્ષક ડૉ. હરેશભાઈ દુધાતની સૂચના અને માર્ગદર્શન હેઠળ LCB PI એ.બી. વોરાએ દારૂની હેરાફેરી કરતા તત્વો સામે કાર્યવાહી કરવા સ્ટાફને સૂચના આપી હતી.
દરમિયાન ASI નરેન્દ્રસિંહ જયરામસિંહ તથા અ.હે.કો. કીર્તેશકુમાર નટવરભાઈને મળેલી બાતમીના આધારે PSI એચ.આર. જેતાવત સહિતની ટીમે ચુંદડી પીકઅપ સ્ટેન્ડ નજીક પહોંચી ટ્રકને કોર્ડન કરી તપાસ હાથ ધરી હતી.
ટ્રકના કેબિન તથા આસપાસ તપાસ કરતાં ચાલક મળી આવ્યો નહોતો. ત્યારબાદ તાડપત્રી ખોલીને તપાસ કરતાં ઓલ સીઝન, મેકડોવેલ્સ નં.1 ડીલક્સ, રોયલ ચેલેન્જ, રોયલ સ્ટેગ વ્હિસ્કી અને કિંગફિશર બીયરનો જથ્થો મળી આવ્યો હતો.
પોલીસે વિદેશી દારૂ ઉપરાંત અંદાજે રૂ.20 લાખની કિંમતની ટ્રક અને તાડપત્રી પણ કબજે કરી છે. ફરાર ટ્રક ચાલક સામે કાયદેસરની કાર્યવાહી હાથ ધરી તેની શોધખોળ શરૂ કરવામાં આવી છે.
બ્યુરો ચીફ: સપના રાઠોડ, પંચમહાલ
About the Author
