సంగారెడ్డి:
ఓటు హక్కు పరిరక్షణ కోసం మరియు కాంగ్రెస్ అగ్రనేత రాహుల్ గాంధీ దేశవ్యాప్తంగా చేస్తున్న పోరాటానికి మద్దతుగా సంగారెడ్డిలో టీపీసీసీ వర్కింగ్ ప్రెసిడెంట్, మాజీ ఎమ్మెల్యే జగ్గారెడ్డి నేతృత్వంలో ‘సేవ్ అవర్ ఓట్స్’ అనే వినూత్న కార్యక్రమాన్ని నిర్వహించారు. ఈ ఉద్యమంలో భాగంగా సంగారెడ్డిలో ప్రత్యేకంగా బ్యాలెట్ బాక్స్ ల ఉద్యమాన్ని చేపట్టారు.
ఓటర్లు తమ పేర్లు, బూత్ నంబర్లు మరియు తమ సందేశాలతో కూడిన వినతులను ఈ బ్యాలెట్ బాక్సుల్లో వేసి ఓటు హక్కు పరిరక్షణ పోరాటానికి తమ సంఘీభావాన్ని తెలియజేశారు. ఓట్ల దొంగతనానికి పాల్పడుతున్న కేంద్రంలోని బీజేపీ ప్రభుత్వాన్ని గద్దె దించాలని, అలాగే కేంద్ర ఎన్నికల కమిషనర్ జ్ఞానేష్ కుమార్ వెంటనే తన పదవికి రాజీనామా చేయాలని ఈ సందర్భంగా డిమాండ్ చేశారు.
ఇదే విషయమై రాహుల్ గాంధీ ఇప్పటికే రాష్ట్రపతిని కలిసి ఫిర్యాదు చేసిన నేపథ్యంలో, ఆయనకు మరింత బలాన్ని చేకూర్చేందుకు సంగారెడ్డి నియోజకవర్గం నుండి పెద్ద ఎత్తున రాష్ట్రపతికి ఓటు కార్డులను పంపిస్తున్నట్లు నిర్వాహకులు వెల్లడించారు. ఈ వినూత్న కార్యక్రమం ద్వారా ప్రజలు తమ ఓటు హక్కును కాపాడుకోవడానికి స్వచ్ఛందంగా ముందుకు వచ్చి సంఘీభావం ప్రకటిస్తున్నారు.
About the Author
